ӨР Олий Мажлис Сенатының Төрағасы Танзила Нарбаева Қазақстан Президентімен кездесті.

Кездесу барысында парламентаралық байланыстарды дамыту және мемлекетаралық қатынастарға тың серпін беруге бағытталған Өзбекстан-Қазақстан ынтымақтастығының өзекті мәселелері талқыланды.

Танзила Нарбаеваны құттықтай тұрып Қасым-Жомарт Тоқаев Астанада өткен Орталық Азияның жетекші әйелдерінің диалогына маңызды бастамаға белсенді қатысып, оны қолдағаны үшін ризашылығын білдірді.

Қазақстан басшысы осы беделді шараның бірінші отырысының нәтижелері өңіраралық ынтымақтастықты жандандыруға қызмет ететініне және Орталық Азиядағы гендерлік теңдік пен тұрақты дамуды қамтамасыз ету саласындағы ұзақ мерзімді шешімдерді әзірлеуге мүмкіндік беретініне сенім білдірді. 

Қазақстан Президенті Қ.Тоқаев Олий Мажлис Сенаты Төрағасының сапары екіжақты ынтымақтастықтың бірегей сипатының айқын мысалы екенін және Қазақстан мен Өзбекстан арасындағы стратегиялық әріптестік пен одақтастық деңгейіне толық сәйкес келетінін атап өтті.

– Өткен жылдың желтоқсан айында Өзбекстанға жасаған мемлекеттік сапарымыздың нәтижелерін жоғары бағалаймыз. Биылғы жылдың 3 наурызында Шымкент қаласында бейресми кездесу өтіп, онда елдеріміз арасындағы ынтымақтастықтың өзекті мәселелері талқыланды. Үкімет деңгейінде үйлестірілген жұмыс жүргізіліп қана қоймай, парламентаралық дипломатияның да белсенді дамып келе жатқаны қуантады. Сондықтан мен келесі жылы Самарқандта өтетін екінші парламентаралық форумды құптаймын, деді Қасым-Жомарт Тоқаев.

Өз кезегінде Танзила Нарбаева жылы қабылдауға ризашылығын білдіріп, Өзбекстан Президенті Шавкат Мирзиёевтің сәлемін жеткізді.

– Сіздің басшылығыңызбен Қазақстанда жүзеге асырылып жатқан кең ауқымды реформаларды жоғары бағалаймыз. Сізді Қазақстанның бүкіл жүйесінің саяси жаңғыруына ықпал еткен ауқымды іс-шаралардың табысты жүзеге асырылуымен құттықтағым келеді.  Еліңіз тура жолмен келеді және халық іске асырылып жатқан реформаларыңызды белсенді қолдайды. Біз бұған қуаныштымыз, – деді Сенат төрағасы.