Ёшлар орасида экологик ҳуқуқий билим ва маданиятни ошириш, Конституция ҳамда экологик қонунларнинг моҳиятини чуқур англаш, қонун устуворлигини таъминлаш ва табиатни муҳофаза қилишда фаолликни рағбатлантириш мақсадида республика миқёсида учинчи бор ўтказилаётган “Сиз экологияга оид қонунни биласизми?” кўрик-танловининг Сирдарё вилоят босқичи жадал ва юқори тайёргарлик асосида бўлиб ўтди.

Гулистон шаҳридаги қурилиш техникуми биносида ташкил этилган ушбу тадбирда Сирдарё вилояти касбий таълим бошқармаси тасарруфидаги касбий таълим муассасаларининг ўқувчи ёшларидан  таркиб топган 6 та жамоа иштирок этди. Улар туман ва шаҳар босқичларида ғолибликни қўлга киритишиб, вилоят босқичида иштирок этиш ҳуқуқини қўлга киритишган эди. Танловда иштирокчилар тўртта асосий шарт бўйича беллашдилар.

“Бу бизнинг ҳудуд” шарти бўйича  жамоалар ўз ҳудудининг экологик ҳолати ва уни яхшилаш бўйича амалга оширилаётган ишлар ҳақида ахборот берган бўлса,  “Интеллектуал ринг” шартида  экологик, ижтимоий ва ҳуқуқий саволларга аниқ ва қисқа жавоблар беришди.

“Экология учун барчамиз масъулмиз!” шартида  иштирокчилар экологик фаоллигини, ташаббус ва ижтимоий лойиҳаларини намоён этган бўлса, “Энг яхши экологик лойиҳа” шартида  ўқувчи ёшлар ўзларининг Инновацион таклиф ва амалий ишланмаларини намойиш қилишди.  

Якуний натижаларга кўра, 1-ўрин ва республика босқичида иштирок этиш ҳуқуқини Оқолтин туман 1-сон техникумининг “Табиат посбонлари” жамоаси қўлга киритди. 2-ўринни Боёвут туманидаги 2-сон техникумининг “Экопосбонлар” жамоаси, 3-ўринни эса Ширин энергетика техникумининг “Ёш ниҳол” жамоаси эгаллашга мувафффақ бўлди.

Танлов якунида  ғолиб ва совриндор жамоалар Сирдарё вилоят Экология ва иқлим ўзгаришлари бошқармаси томонидан диплом ва эсдалик совғалари билан тақдирланишди.

Ғулом Примов, ЎзА мухбири