Олий Мажлис Қонунчилик палатаси депутати Мавлуда Ибрагимова ҳудудларда бўлиб, сайловчилар билан юзма-юз мулоқот қилди, ижтимоий соҳа масканларига ташриф буюриб, уларнинг фаолиятини яқиндан ўрганди.

Жумладан, депутат Бувайда туманидаги туғуруқ комплексида бўлиб, унинг шароити билан танишди. Туғуруқ комплекси вакиллари билан мулоқот давомида ҳар бир шифокор инсон ҳаёти учун жавобгар экани ва бу масъулиятни ҳис этган ҳолда иш олиб бориш лозимлиги қайд этилди.

Бу каби учрашувлар тиббиёт соҳасида шаффофликни таъминлаш ва фидойи кадрлар меҳнатини эътироф этишда муҳим аҳамият касб этади.

Шунингдек, депутат Учкўприк туманидаги туғуруқ комплекси фаолияти билан ҳам танишди. Ташриф давомида муассасада олиб борилаётган таъмирлаш ишлари кўздан кечирилди.

Шу билан бирга, амалдаги инфратузилма, тиббий хизмат кўрсатиш ҳолати ва фуқаролар учун яратилган шароитлар ўрганилди. Аниқланган камчилик ва муаммолар юзасидан тегишли мутасаддиларга таклиф ва тавсиялар берилди.

М.Ибрагимова Учкўприк туманида жойлашган Сариққўрғон қишлоғидаги оилавий поликлиника фаолияти билан ҳам танишди. Ташриф давомида муассасанинг умумий ҳолати кўздан кечирилди.  

Аниқланишича, бино ҳозирда таъмирталаб аҳволга келиб қолган. Поликлиника биноси бўйича умумий маълумот тайёрланиб, вилоят ҳокимига тақдим этилди. Ҳоким ва депутат ташаббуси билан бинода капитал таъмирлаш ишларини амалга ошириш масаласи шу йил иккинчи чорак дастурига киритилди.

М.Комилова,

ЎзА