Сирдарё вилоятининг Ширин шаҳар ҳокимлигида таълим тизимида шаффофликни таъминлаш ва коррупциянинг олдини олишга қаратилган очиқ мулоқот бўлиб ўтди. “Таълим – коррупциядан холи соҳа” шиори остида ташкил этилган тадбирда соҳага доир ислоҳотлар, мавжуд муаммолар ва уларнинг ечимлари атрофлича муҳокама қилинди.

Учрашувда Мактабгача ва мактаб таълими вазирлигининг Коррупцияга қарши кураш ҳуқуқий-назорат бошқармаси бошлиғи Шаҳобиддин Жўрабоев, шаҳар ҳокимияти мутасаддилари, ҳуқуқни муҳофаза қилувчи органлар ва Давлат бошқарув самарадорлиги агентлиги вилоят филиали вакиллари иштирок этишди. Мутасаддилар таълим соҳасида электрон хизматлар жорий этилганига қарамай, айрим йўналишларда коррупция хавфи ҳали ҳам мавжудлиги, бу эса тизимли назорат ва профилактика ишларини талаб этишини таъкидлашди.

Тадбирда болани боғчага жойлаштириш, 1-синфга қабул қилиш, педагог кадрларни аттестациядан ўтказиш, лицензиялаш, ҳужжатларга апостил қўйиш каби қатор хизматларнинг электрон шаклга ўтказилгани маълум қилинди. Рақамлаштириш коррупсион омилларни камайтирган бўлса-да, ушбу жараённинг самарадорлигини янада оширишга оид таклифлар ўртага ташланди.

Шаҳобиддин Жўрабоев таълим муассасаларидаги ҳар бир жараёнда очиқлик ва масъулият асосий тамойил бўлиши зарурлигини таъкидлади:

–  Коррупцияга қарши кураш аввало раҳбарнинг ички позицияси ва масъулиятидан бошланади. Мактабдаги ҳар бир жараён – ўқувчини қабул қилишдан тортиб, ўқитувчининг малакасини оширишгача шаффоф бўлиши керак. Қонун талаби ва жамоатчилик ишончи биз учун энг муҳим мезондир,

Учрашувда сўнгги йилларда аниқланган коррупцияга оид ҳуқуқбузарликлар таҳлил қилинди. Мансабдор шахсларнинг жавобгарлиги кучайтирилгани, бюджет маблағларидан мақсадли фойдаланиш, давлат харидларини шаффоф ўтказиш ва кадрлар сиёсатида қонунбузилишларга йўл қўймаслик ҳар бир раҳбарнинг бевосита бурчи экани яна бир бор эслатиб ўтилди.

Шунингдек, коррупцияга нисбатан “ноль толерантлик” сиёсати қатъий амалга оширилаётгани, қонунбузарларга нисбатан жазо чоралари кескинлаштирилгани маълум қилинди.

Тадбир якунида иштирокчиларга коррупциянинг жамият тараққиётига етказадиган зарари ҳақида видеоролик намойиш этилди.  

Мулоқот давомида таълим тизимида шаффофликни таъминлаш, жамоатчилик назоратини кучайтириш ва ёшларда коррупцияга қарши иммунитетни шакллантиришга доир таклифлар илгари сурилди.

Ғулом Примов, ЎзА мухбири