Бухоро давлат университетида ёшларни замонавий илм-фан ютуқларини мукаммал эгаллаган, юксак салоҳиятли, юқори малакали кадр сифатида тайёрлаш учун барча шароит яратилган.

Олий таълим масканида талабаларнинг бўш вақтини мазмунли ташкил этишга алоҳида эътибор қаратилган. Хусусан, “Кафедра кунлари”, “Саломатлик учун 5000 қадам” шиори остида университет ҳудудида юриш марафони, “Ижодкор талаба” лойиҳаси, “Истироҳат боғларига ташриф куни”, “Профилактика куни”, “Беш ташаббус куни”, “Музей ҳамда тарихий қадамжоларга ташриф куни”  каби қатор лойиҳалар ушбу мақсадга хизмат қилмоқда. Шунингдек, турли мавзулардаги давра суҳбатлари, учрашувлар, маданий-маърифий тадбирлар, “Кино кунлари”ни ўтказиш анъана тусини олган. Талаб ва истаклар асосида ташкил этилаётган “Заковат”, “ҚВЗ”, “Мунозара”, “Талант шоу” лойиҳаларида талабаларнинг интеллектуал билими ва маҳорати чархланмоқда.  

[gallery-15082]

Университетда 7 та талабалар турар жойи мавжуд бўлиб, қуввати 2555 тани ташкил этади. Кундузги таълим шакли бўйича таҳсил олувчи жами 11631 нафар талабадан 7135 нафари ўз уйи ва яқин қариндошлариникига, 2349 нафари талабалар турар жойига, 2147 нафари ижара хонадонига жойлашган.  

Талабалар турар жойида ташкил этилган “Беш ташаббус маркази” ҳам ёшларнинг бўш вақтини самарали ташкил этишга хизмат қилмоқда.  Бу ерда ҳар икки ҳафтада бир марта “Заковат” интеллектуал ўйини, шашка ва шахмат спорт тури бўйича машғулотлар ўтказилади. Шунингдек, бой китоб фондига эга кутубхона фаолият юритмоқда.  

Тоҳир ИСТАТОВ(сурат),ЎзА