Berdaq nomidagi Qoraqalpoq davlat universitetida 550 o‘ringa mo‘ljallangan talabalar turar joyi foydalanishga topshirildi.

Shu munosabat bilan tashkil etilgan tadbirda Qoraqalpog‘iston Respublikasi Jo‘qorg‘i Kengesi Raisi M.Kamalov, O‘zbekiston Respublikasi oliy va o‘rta ta’lim vaziri o‘rinbosari S.Buzrukxonov ishtirok etdi.

Ta’kidlanganidek, 2022-2026 yillarga mo‘ljallangan Yangi O‘zbekistonning taraqqiyot strategiyasi va uni “Inson qadrini ulug‘lash va faol mahalla yili”da amalga oshirishga oid davlat dasturi, O‘zbekiston Respublikasi Vazirlar Mahkamasining 2021 yil 9 sentyabrdagi “Respublika oliy ta’lim muassasalarida talabalarni turar joy bilan qamrab olish darajasini oshirish chora-tadbirlari to‘g‘risida”gi qarori asosida respublika oliy ta’lim muassasalarida talabalarni turar joy bilan qamrab olish darajasini oshirish, barcha qulayliklarga ega bo‘lgan zamonaviy talabalar turar joylarini qurish uchun qo‘shimcha sharoitlar yaratish borasida keng ko‘lamli ishlar amalga oshirilmoqda.

[gallery-6795]

Talabalar turar joyining qurilish va rekonstruksiya ishlari uchun universitetning byudjetdan tashqari mablag‘lari hisobidan 14 milliard 61 million so‘m ajratilib, “Invest Stroy Nukus” mas’uliyati cheklangan jamiyati quruvchilari tomonidan barpo etildi. Zamonaviy loyiha asosida qad rostlagan talabalar turar joyi 1 milliard 21,7 million so‘mlik mebel jihozlari, muzlatkich, kir yuvish mashinalari, elektr plitalar, televizorlar bilan jihozlandi.

Talabalar bo‘sh vaqtini mazmunli o‘tkazishi, maroqli dam olishi uchun barcha zarur sharoitlar yaratilgan. Zamonaviy axborot texnologiyalari, kompyuter xonalari, axborot-resurs markazi, turli to‘garaklar, shu bilan birga dam olish, ovqatlanish va yuvinish xonalari mavjud. Oliy o‘quv yurti mutasaddilarining ta’kidlashicha, kelgusi yilda 550 o‘ringa mo‘ljallangan talabalar turar joyi ishga tushiriladi.

Tadbir ishtirokchilari talabalarga yaratilgan sharoitlar bilan yaqindan tanishdi.

Dovud Abibullayev, Maqsad Habibullayev (surat), O‘zA