Андижон шаҳридаги Универсал спорт мажмуасида Андижон давлат тиббиёт институтининг биринчи босқичига қабул қилинган талабалар иштирокида “Талабаликка бағишлов” деб номланган маънавий-маърифий тадбир бўлиб ўтди.
Ўзбекистон Республикаси Давлат мадҳияси ижроси билан бошланган тадбир очилишида институт ректори, профессор Мадаминжон Мадазимов, институт профессор-ўқитувчилари сўз олиб, жорий йилда ўқишга қабул қилинган 1- босқич талабаларини муборакбод этди.
– Энг аввало, сизларни жамоамиз сафига қўшилганингиз билан табриклайман, – деди ректор. – Энди биз бир оила, бир жамоамиз. Институт профессор-ўқитувчилари сизларни орзу-мақсадларингизга эришишингиз, етук мутахассис бўлишингиз учун бор билим ва салоҳиятини ишга солади, ана шу йўлда биз сизларни ҳамиша қўллаб-қувватлаймиз.
Ишончим комилки, Сизлар ўз олдингизга аниқ мақсадлар қўйиб, берилган имкониятлардан унумли фойдаланасиз, ўқиб, изланишдан тўхтамайсиз, фақат олға интиласиз.
Тадбирда биринчи босқич талабаларига анъанавий “Билимлар калити” ҳамда “Баҳолаш дафтарчаси” тантанали равишда топширилди.
Шундан сўнг талаба ёшлар талабалик қасамёдини қабул қилди. Талабалар номидан сўз олганлар қасамёдларига содиқ бўлиб, ўқишда илғор бўлишга, келгусида ўз ишларининг малакали мутахассиси бўлиб, халқимиз саломатлигини сақлаш, юртимиз равнақи йўлида муносиб хизмат қилишга ваъда берди.
– Шифокорлик шарафли ва масъулиятли касб, – дейди Андижон давлат тиббиёт институти даволаш факультети 1- босқич талабаси Зумрадхон Аҳмадалиева. – Аввало, институт талабаси бўлган барча тенгдошларимни муборакбод этаман. Бугунги тадбирда устозларнинг сўзларидан шифокор масъулиятини янада чуқурроқ ҳис этдим. Насиб этса, биз талаба ёшлар институтни муваффақиятли тамомлаб, етук шифокор бўлиб, халқимизга, юртимизга муносиб хизмат қиламиз.
Тадбир давомида намойиш этилган бадиий дастур барчага кўтаринки ва байрамона кайфият улашди.
Маълумот ўрнида, жорий 2025-2026 ўқув йилида Андижон давлат тиббиёт институтига 2 минг 324 нафар талаба қабул қилинди.
Ф. Убайдуллаев, З. Умрзоқов (фото),
ЎзА мухбирлари