Маълумки, жорий йил май ойида соғлиқни сақлаш вазири Амрилло Иноятов бошчилигидаги делегациянинг АҚШга хизмат сафари доирасида дунёга машҳур Колумбия университети раҳбарияти билан тиббий таълим бўйича қатор манфаатли келишувларга эришилган эди.

Бунинг амалий натижаси сифатида мазкур ўқув юрти декани, профессор Кристиан Столер Тошкент давлат стоматология институтига ташриф буюрди.  

Меҳмон иқтидорли талабалар, ёш мутахассислар ва профессор-ўқитувчилар билан давра суҳбати ўтказди. Институт раҳбарияти билан учрашувда эса бу ерда таҳсил олаётган 30 нафар иқтидорли талаба, 5 нафар докторант ҳамда 10 нафар педагогнинг академик алмашинув дастури бўйича Колумбия университетида малака ошириши юзасидан келишувга эришилди.  

Маълумот ўрнида таъкидлаш лозимки, Колумбия университети жаҳон рейтингида юқори поғоналарни банд этиб келмоқда.

Жаҳон фармацевтика бозорида университет олимларининг кашфиёт ва ихтиролари ном қозонган.  

Муҳайё Тошқораева, ЎзА