Янги Ўзбекистоннинг 2022-2026 йилларга мўлжалланган тараққиёт стратегиясида юртимизда “яшил” энергетикани ривожлантириш муҳим вазифа сифатида белгиланган.
Фарғона политехника институтида мазкур йўналишда тадқиқот ишлари амалга оширилмоқда. Жумладан, институт талабаси Абдулвосит Хайруллаев томонидан 1-5 квтли паст айланишда ишловчи шамол генератори яратилди.
“Шамол генератори моделини йиғиш ва техник моделлаштириш” лойиҳаси “FERPI-INNO” унитар корхонаси томонидан умумий қиймати 33 миллион сўмга тайёрланди ва амалиётга татбиқ этилди.
– Ушбу лойиҳа устида институтдаги устозларим билан биргаликда икки йилдан ортиқ муддатда иш олиб борганмиз, – дейди 4-курс талабаси Абдулвосит Хайруллаев. – Ҳозирда шамол генераторини олийгоҳ ҳудудига ўрнатдик ва бу орқали бир соатда 0,5 квт/с, бир кунда 12 квт/с электр энергияни тежаб қоляпмиз. Мазкур генератор шамолдан электр энергиясини олиб, махсус мослама яъни аккумуляторга йиғади ва инвертор қурилмаси орқали ўзгарувчан ток кўринишида истеъмолчиларни электр токи билан таъминлайди.
М.Сулаймонов, ЎзА