Талаба ва тадқиқотчилар учун Академик Саримсоқов номидаги стипендия жорий этилди
Мазкур стипендия математика йўналишида таълим олаётган талабалар ва илмий изланиш олиб бораётган тадқиқотчиларга берилади.
“Математика соҳасидаги таълим сифатини ошириш ва илмий-тадқиқотларни ривожлантириш чора-тадбирлари тўғрисида”ги Президент қарорининг ижроси юзасидан Математика институти ҳузуридаги Математика фани ва таълимини ривожлантиришни қўллаб-қувватлаш Жамғармаси Академик Тошмуҳаммад Алиевич Саримсоқов номидаги стипендия жорий этди.
Мазкур стипендия республика олий таълим муассасаларида Математика таълим йўналишларида 2-курсни тугатган бакалавриат, 1-курсни тугатган магистратура талабалари ва 1-босқични тугатган таянч докторантларга тайинланади.
Академик Т.А.Саримсоқов номидаги стипендия квотаси (стипендия миқдори) 2020-2021 ўқув йили учун 5 нафар бакалавриат (10 ой муддатга ҳар ойда 750 минг сўмдан), 5 нафар магистрант (10 ой муддатга ҳар ойда 1 млн. сўмдан) ва 2021 йил учун 5 нафар таянч докторант (10 ой муддатга ҳар ойда 1,5 млн. сўмдан) учун белгиланди.