Bugun, 2 sentyabr kuni 82 nafar talaba-sportchilar, murabbiy va mutaxassislardan iborat O‘zbekiston sport delegatsiyasi joriy yilning 3-9 sentyabr kunlari Qirg‘izistonning Cho‘lpon-ota shahrida talabalar o‘rtasida bo‘lib o‘tadigan III Turkiy davlatlar universiada o‘yinlarida ishtirok etish uchun jo‘nab ketdi.

Universiada o‘yinlarida Qirg‘iziston, Qozog‘iston, Turkiya, Ozarbayjon va O‘zbekiston jamoalari qatnashish talabnomalarini taqdim etgan.

O‘yinlar dasturiga muvofiq, musobaqalar yettita sport turi - shaxmat, stol tennisi, voleybol, dzyudo, erkin va yunon-rum kurashi hamda futzal bo‘yicha o‘tkaziladi.

Mazkur Universiada o‘yinlarida mamlakatimiz talaba-sportchilari dasturdan o‘rin olgan barcha yo‘nalishlarda Vatanimiz sharafini himoya qiladi.

T.Ro‘ziyev,

O‘zA