Ижтимоий тармоқларда «Бизга келган видеога кўра, Хатирчида машиналарни тўхташ мумкин эмас жойга тўхтаганини юбориб пул ишлаган одамни ушлашгани айтилмоқда» номли видео тарқалган эди.

Ушбу ҳолатга Навоий вилояти ИИБ Расмий муносабат билдирди.

Муносабатда қайд этилишича, 2021 йилнинг 29 июнь куни Хатирчи туманининг Кўксарой маҳалласида яшовчи Ш.А. ва С.О. моддий манфаат илинжида туман марказида таксичилик билан шуғулланувчи шахсларнинг автомашиналарининг давлат рақамларини яширин равишда суратга олган. Таксичилик билан шуғулланувчи бир неча шахслар уларни кўриб қолиб, нима сабабдан суратга тушириб юрганини, бунинг учун уларга жарима белгиланаётганини маълум қилган.

Ш.А. ва С.О. машиналарнинг давлат рақамларини суратга туширмаганини айтиб, қилган ишларидан бўйин товлашган. Шундан сўнг ушбу шахсларни такси ҳайдовчилари уриб-дўппослаб, суратга олган телефон аппаратларини тортиб олишган ҳамда 85 Q 127 GA давлат рақамли “Spark” машинасига моддий зарар етказган.

Олиб борилган тезкор тадбир давомида ушбу шахсларнинг барчаси туман ИИБга олиб келиниб, шахсига аниқлик киритилган ва ҳолат юзасидан батафсил тушунтириш хатлари олинган.

Айни пайтда ҳолат юзасидан Хатирчи туман ИИБ томонидан суриштирув ишлари олиб борилмоқда.

Абдували Бўриев,

ЎзА