Таиландда тезюрар темирйўл линиясида қурилиш ишлари олиб борилаётган вақтда пойтахтдан Убон-Ратчатани провинциясига кетаётган поезд устига кўтарма кран қулаб тушди.

Мамлакат транспорт вазири Пхипхат Ратчакитпракарн поездда жами 195 нафар йўловчи бўлганини маълум қилди. Унинг таъкидлашича, кучли зарб натижасида воқеада 22 киши ҳалок бўлган ва 64 киши жиддий жароҳатланган. 

– Ҳозиргача 19 та жасад топилди, аммо вагонлар ичида ҳали ҳам қурбонлар жасадлари бор, - деди вазир.

“Fox News” телеканали хабар беришича, фалокат юз берган пайтда поезд тахминан соатига 120 километр тезликда ҳаракатланаётган бўлган.

Расмийлар вазият назорат остида экани ва поезд ичида қолиб кетган одамларни қидираётганини маълум қилган.

Таиланддаги қурилиш майдонларида ҳалокатлар тез-тез содир бўлиб туради, бу асосан стандартлар ва меъёрларга риоя қилиниши устидан етарли назорат йўқлиги билан боғлиқ. Ўтган йили ҳам Бангкокда зилзиладан сўнг баланд қурилиш объекти қулаб тушиб, 100 дан ортиқ одам ҳалок бўлган эди.

Ў.Алимов, ЎзА