1 мамырдан бастап вакцина алған туристер Таиландқа келгеннен кейін ПТР тестілеуден босатылады.

The Thaiger газетінің хабарлауынша, Таиланд билігі 1 мамырдан бастап вакцина қабылдаған саяхатшылар үшін ПТР сынақтарын талап етпейтін болды және шетелдік саяхатшыларды ынталандыру үшін елге кірерде талап етілетін сақтандыру сомасын екі есе азайтты.

COVID-19 таралуын бақылау және алдын алу орталығының (CCSA) мәліметінше, шетелдік туристер кіру үшін кемінде 10 мың доллар сомасында індеттен сақтандыру қажет болады.

Газет дерегінше, екпе алмаған саяхатшылар әлі күнге дейін алдын ала төлем негізінде қонақүйді брондауы керек болады, сондай-ақ оқшауланудың бесінші күні келгенде ПТР тестін тапсыру керек. Саяхатшылар Таиландқа келуден кемінде 72 сағат бұрын өткен ПТР сынағы теріс нәтижесі бар сертификатты ұсынған жағдайда, карантин талабына жатқызылмайды.