Кейинги йилларда мамлакатимиз ипакчилик саноати тобора ривожланиб бормоқда. Хорижий мамлакатлар билан бу борада ҳамкорлик қилишга алоҳида эътибор қаратилиб, мутахассислар ташрифи амалга оширилмоқда.

Ипакчилик ва жун саноатини ривожлантириш қўмитасига Таиланд қироличаси Ипакчилик департаменти вакилларидан иборат делегация ташриф буюрди. Ташриф давомида меҳмонлар “Ўзбекипаксаноат” уюшмаси фаолияти билан танишди. Ўзбек ипакчилигидаги янгиликлар, кейинги режалар, ҳамкорлик масалалари хусусида ўзаро фикр алмашди.  

Учрашувда Таиланд қироличасининг ипакчилик департаменти расмий вакили Танялук Проммани мамлакатимиз ипакчилик салоҳиятини ўрганиш ва ҳамкорлик алоқаларини йўлга қўйиш муҳимлигини қайд этди.    

Танялук Проммани – Таиланд Қироллик оиласи билан яқин муносабатга эга, Таиланд Қиролининг қизи, малика Сириваннаварининг дўсти ва маслаҳатчиси ҳисобланади.

Шунингдек, у халқаро майдонда ўтказиладиган тадбирларда Таиланд ипагини тақдим этишда Қироллик оиласи номидан Таиланд вакили сифатида иштирок этиб келади.  

Меҳмонга юртимиз ипакчилик секторида олиб борилаётган ишлар, ипакчилик корхоналарига берилган имтиёз ва преференциялар хусусида маълумот берилди. Ўз ўрнида Танялук Проммани Таиланд ипакчилигининг вужудга келиши, бугунги кундаги фаолияти ҳамда ўзбек ипакчилиги ва Тайланд ипакчилигининг ўхшаш жиҳатлари ҳақида гапирди.  

–Мен ёшлигимдан Буюк ипак йўли ҳақида кўп эшитганман ва айнан Ўзбекистонга келишни орзу қилганман, –деди Танялук Проммани. – Бу ерга келишдан олдин юртингиз тарихини ўргандим. Келиб кўриб шунга амин бўлдимки, сизларда қадимий анъаналар, миллий удумлар ҳамда ҳунармандчилик фаолияти юқори даражада сақланиб қолинган. Кузатишларимдан кўрдимки, Ўзбекистон ва Таиланднинг ўхшаш тарафлари жуда кўп, айниқса пиллачилик фаолияти томонидан. Сабаби бизда ҳам ипакнинг қадри баланд, пилла етиштиришга талаб катта. Бу ҳам мени ҳурсанд қилди. Шунингдек, ўзбек халқининг меҳмондўстлиги эътиборга молик.  

<iframe width="640" height="420" src="https://www.youtube.com/embed/pcA_4tvoMMA" title="Таиланд ипакчилик департаменти вакили: Ўзбекистон ва Таиланднинг ипакчилик соҳасида ўхшаш тарафлар.." frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Учрашув якунида ипакчилик соҳасида Таиланд инвесторларини жалб қилиш, ўзаро ҳамкорликда қўшма лойиҳаларни амалга ошириш масалалари атрофлича муҳокама қилинди.  

Гулноза Бобоева, Аброр Содиқов (видео), ЎзА