Таэквондо WT бўйича Ўзбекистон миллий терма жамоаси янги мавсумга тайёргарликни бошлади. Пойтахтимиздаги “Universal” спорт саройида ўтказилаётган йилнинг илк ўқув-машғулот йиғинида терма жамоанинг тўлиқ таркиби иштирок этмоқда.

Мазкур йиғинда жами 45 нафар таэквондочи қатнашиб, машғулотлар кунига икки маҳалдан ташкил этилмоқда. Асосий эътибор спортчиларнинг техник ва тактик маҳоратини янада оширишга қаратилган.

Маълумот ўрнида айтиш жоизки, миллий терма жамоамиз 2026 йилдаги илк халқаро мусобақасини февраль ойида бўлиб ўтадиган “Fujairah Open” халқаро очиқ чемпионатида ўтказиши режалаштирилган.

Эслатиб ўтамиз, таэквондочиларимиз ўтган мавсум, БАА мезбонлигидаги “Fujayra Open-2025” турнирини катталар ўртасида 2 та олтин, 1 та кумуш, 5 та бронза, кадетлар орасида эса 3 та олтин, 6 та кумуш, 4 та бронза медаль билан якунлаган.

Жавоҳир Тошхўжаев, ЎзА