Корея Республикасининг Чунчеон шаҳрида таэквондо WТ бўйича ёшлар ўртасида давом этаётган жаҳон чемпионатининг ортда қолган тўртинчи кунги мусобақалари сарҳисобига кўра, Ўзбекистон терма жамоаси аъзолари 1 олтин ва 1 та бронза медалига эга бўлиб турибди.

Бугун, 5 октябрь куни жаҳон чемпионатининг бешинчи кунги беллашувлари бўлиб ўтмоқда.

Таэквондочи ёшларимиздан Муҳиддин Яхшибоев -78 килограмм вазннинг 1/16 финалида кувайтлик Кунал Кумаватни 2:0 (10:1, 14:2) ҳисобида таслим этган бўлса, -73 килограммдаги вакилимиз Аҳаджон Мухторов 1/32 финалда нейтрал байроқ остида даянга чиққан Владислав Хребендан 2:0 (7:2, 4:2) ҳисобида устун келди.  

Терма жамоамиз аъзоларидан Шаҳризода Аҳмедова (-68) 1/16 финалда кореялик Лим Е Римга имкониятни бой бериб қўйди.

Эслатиб ўтамиз, кеча мамлакатимиз ёш таэквондочиларидан Беҳруз Салимов -48 килограмм оғирликда ўтказилган баҳсларда бронза медалига мушарраф бўлган бўлса, мусобақанинг иккинчи кунида маҳоратли спортчимиз Дилмуроджон Маъруфжонов(-45) жаҳон чемпиони бўлганди.

Чемпионат баҳслари 6 октябрга қадар давом этади.

Т.Рўзиев, ЎзА