Божхоначилар 11 миллиард 881 миллион 700 минг сўмлик товарларни алмаштириб қўйиш операциясини фош қилди

Республикамиз божхоначилари хориждан келтирилган товарлар учун божхона тўловларидан бўйин товлаш мақсадида содир этилган навбатдаги найрангга чек қўйди, деб хабар бермоқда Самарқанд вилояти божхона бошқармаси ахборот хизмати.

Давлат божхона қўмитаси ва унинг Фарғона, Навоий, Наманган ва Самарқанд вилоятлари бўйича бошқармалари тезкор тузилмалари томонидан ўтказилган кенг қамровли тезкор тадбирлар давомида республика ҳудудига импорт тарзида олиб кирилган товар-моддий бойликларни божхона расмийлаштирувига қадар алмаштириб қўйишга бўлган уринишларга чек қўйилди.

Гап шундаки, Тошкент вилоятида рўйхатдан ўтказилган тадбиркорлик субъектларидан бирининг номига хориждан келтирилган юк контейнеридаги товарлар, яъни косметика ва пардоз воситалари белгиланган тартибда расмийлаштириш учун «Қўқон» ташқи иқтисодий фаолият божхона постига йўналтирилади.

Аммо, мазкур контейнердаги товарлар белгиланган тартибда кўздан кечирилганида  косметика ва пардоз воситалари ўрнига салкам 1,5 тонна шиша идишлар ҳамда 21 тоннадан зиёд кир ювиш кукунлари ортилганлиги аниқланди. Бу эса юклар йўл давомида алмаштириб қўйилганлигини англатади. Шундан сўнг тезкор гуруҳ томонидан амалга оширилган тадбир натижасида юк контейнерини олиб келган ҳайдовчи излаб топилди. Унинг кўрсатма беришича, контейнердаги товарлар пойтахтнинг Бектемир туманидаги омборлардан бирига тушириб қолдирилган.

Ҳолат юзасидан кечиктириб бўлмас тезкор-қидирув тадбирлари ўтказилиб, зудлик билан ушбу омбор кўздан кечирилди. Аммо, бу вақтда омборга туширилган товарлар бошқа транспорт воситасига ортилиб бу ердан ҳам олиб чиқиб кетилганлиги маълум бўлди.Тезкор ходимлар эса ушбу юкларни олиб чиқиб кетган автотранспорт воситасини аниқлашди. Қарангки, ундаги юклар Самарқанд вилояти Ургут туманидаги тадбиркорлардан бирининг омборига туширилган экан.

Мазкур омбор белгиланган тартибда кўздан кечирилганда, бу ерда 461 турдаги салкам 721 минг дона косметика ва пардоз воситалари, шунингдек шиша идишлар ва кир ювиш кукунлари сақланаётганлиги аниқланди. Ушбу товарларнинг умумий қиймати эса 11миллиард 881 миллион 700 минг сўмни ташкил қилмоқда. Ҳозирда мазкур ҳолат юзасидан божхона органлари томонидан жиноят иши қўзғатилган.

Таъкидлаш жоизки, йил бошидан буён республикамиз божхоначилари томонидан аниқланган 7700 дан ортиқ божхона қонун бузилиши ҳолатларида 547 миллиард сўмлик товарларнинг ноқонуний олиб ўтилишига чек қўйилган.

ЎзА