Вилоятнинг энг олис ҳудудларидан бири – Янгиобод туманида тадбиркорлик яқин йилларгача бошқа жойларга қараганда анча суст ривожланаётган эди. Жорий йилда маҳаллаларда уйма-уй юриб, оилалар шароитини ўрганиш, тарғибот ишларини олиб бориш давомида тўққиз юзга яқин хонадон эгасининг банкдан кредит олиб, тадбиркорлик фаолиятини бошлаш истаги борлиги аниқланди. Натижада асаларичилик йўналишида 20, боғдорчилик бўйича 2, иссиқхона қуриш учун 14, тикувчилик цехи очиш учун 2, чорвачилик йўналишида 100 нафардан зиёд фуқарога тадбиркорлик фаолиятини йўлга қўйиш учун банклар томонидан кредит маблағлари ажратилди.

– Кўп йиллардан буён тикувчилик билан шуғулланаман, бироқ фаолиятимни кенгайтиришга маблағ етишмаётган эди, – дейди Савот қишлоғида яшовчи тадбиркор Муҳаррам Мирсаидова. – Вилоят, туман раҳбарлари иштирокида ўтказилган сайёр қабулда шу масала бўйича мурожаатимдан сўнг тикувчилик цехи барпо этишимга ёрдам кўрсатилди. Тижорат банкидан 100 миллион сўм кредит ажратилиши иш бошлашимга замин яратди.

Аҳолини тадбиркорлик соҳасига жалб этиш изчил давом эттирилаётгани ўз самарасини бераётир. Қишлоқларда янги ишлаб чиқариш, хизмат кўрсатиш субъектлари пайдо бўлиши билан янги иш ўринлари яратилмоқда. Айни пайтда вилоятда кичик бизнес ва хусусий тадбиркорликнинг бандликдаги улуши 82 фоизни ташкил этмоқда.

Маълумотларга кўра, вилоятда амалга оширилган қурилиш ишларининг 97 фоизи кичик бизнес ва хусусий тадбиркорлик субъектлари томонидан бажарилган. Бундан ташқари, ушбу тоифа тадбиркорлик субъектлари томонидан 1 триллион 400 миллиард 600 миллион сўмлик саноат маҳсулотлари ишлаб чиқарилган.

Кичик бизнес ва хусусий тадбиркорлик субъектларининг савдо ва хизмат кўрсатиш соҳаларидаги улуши ҳам ортиб бораётир. Йилнинг ўтган даврида чакана товар айланмасининг 2 триллион 898 миллиард 300 миллион сўми ёки 92,2 фоизи тадбиркорлик субъектлари улушига тўғри келди. Шунингдек, 1 триллион 551 миллиард 500 миллион сўмлик ёки барча хизматларнинг 68,3 фоизи кичик бизнес ва хусусий тадбиркорлар томонидан амалга оширилди.

Кичик бизнес ва хусусий тадбиркорликка кенг эркинлик бериш, уларни ҳар томонлама қўллаб-қувватлаш, фаолиятига аралашувни тубдан қисқартиш, ҳуқуқбузарликларнинг барвақт олди олинишига қаратилган ишлар сифат жиҳатидан янги босқичга кўтарилмоқда. Буни эришилаётган натижалар кўрсатиб турибди.