Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девонида Наманган шаҳридаги “Мўъжиза гиламлари” масъулияти чекланган жамиятининг мурожаати асосида тўқимачилик ва тикув-трикотаж фаолияти билан шуғулланувчи тадбиркорларга электр энергияси бўйича имтиёз қўлланилиши ўрганилди.

Таъкидлаш лозим, давлатимиз раҳбарининг 2023 йил 10 январдаги “Пахта-тўқимачилик кластерлари фаолиятини қўллаб-қувватлаш, тўқимачилик ва тикув-трикотаж саноатини тубдан ислоҳ қилиш ҳамда соҳанинг экспорт салоҳиятини янада ошириш чора-тадбирлари тўғрисида”ги фармонига кўра, тўқимачилик ва тикув-трикотаж фаолияти билан шуғулланувчи тадбиркорлик субъектларига электр энергияси истеъмоли учун бир ойлик олдиндан тўлов талаби бекор қилинган.

Таҳлил натижалари, Наманган вилоятида фаолият кўрсатаётган 140 та тўқимачилик ва тикув-трикотаж йўналишидаги ишбилармонга нисбатан имтиёз қўлланилмай, истеъмол учун олдиндан тўлов ундириб келинганлигини кўрсатди. Шунга мувофиқ, Бизнес омбудсман томонидан аниқланган ҳолатлар юзасидан тадбиркорларнинг манфаатларини ҳимоя қилиш борасида хулоса киритилди.

Киритилган хулоса натижасида тадбиркорлик субъектларига имтиёз қўлланилиши таъминланиб, 140 субъектга қўлланилган 2,4 миллиард сўм маблағ ҳисобдан чиқарилди ҳамда электр энергияси учун олдиндан тўлов ундириш амалиёти бекор қилинди.

  Оқилхон Дадабоев, ЎзА.