– Ҳар куни тасдиқланган график асосида тадбиркорлардан келиб тушган муаммолар ташкилот ва идоралар вакилларидан иборат ишчи гуруҳ билан бирга муҳокама қилиниб, жойида ҳал этиш чоралари кўрилди, – дейди Нукус шаҳридаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхонаси мудири Ажинияз Қайратдинов.
– Қабулхонада тадбиркорларни қабул қилиш махсус ишчи гуруҳи ва штаб таркиби тасдиқланган. Уларга ваколатли орган вакиллари бириктирилди. Қабулхонага ўтган йил мобайнида 352 та масала бўйича 316 та мурожаат келиб тушди. Шундан 212 таси қаноатлантирилди, 132 та масалага ҳуқуқий тушунтириш берилди. 8 та мурожаат рад этилди. Кўриб чиқилган мурожаатларнинг 34 таси мамлакатимиз, 175 таси Қорақалпоғистон Республикаси, 143 таси туман миқёсида ҳал этиладиган масалалар ҳисобланади. Булар асосан банк кредитлари, ер, кадастр ва архитектура, қурилиш, солиқ, рухсатномалар, лицензиялар ва ҳужжатлар расмийлаштириш, инфратузилма ва бошқа масалалардан иборат.
Жумладан, “Soglom oila soglom jamiyat” хусусий корхонаси мурожаат этиб, аҳолига тиббий хизмат кўрсатиш йўналишида тадбиркорлик фаолиятини бошлаганлиги ва ушбу фаолиятини кенгайтириш мақсадида керакли ускуна сотиб олиш мақсадида 245 миллион сўм имтиёзли кредит ажратилиши учун банкка онлайн ариза топширган. Лекин, банк томонидан ўз вақтида кредит ажратилмаётганлигидан норози эканлиги билдирилган. Ушбу мурожаат Нукус шаҳридаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхонасининг саъй-ҳаракати билан ижобий ҳал қилинди. “Timur Аnna” масъулияти чекланган жамиятига қарашли 0,15 га ер участкасига қишлоқ хўжалик техникаларига хизмат кўрсатиш марказини ташкил этиш режалаштирилганлиги, лекин архитектура бўлими томонидан тегишли рухсатнома бериш ишлари кечиктирилаётганлиги билдирилган. Ушбу мурожаат ҳам ижобий ҳал қилинган.
Фуқаро Манзура Ерниязова гўзаллик салони фаолиятини ривожлантириш мақсадида Ўзбекистон Республикаси Президентининг Оилавий тадбиркорликни ривожлантириш дастурларига асосан 33 миллион сўм кредит сўраб, электрон тарзда аризалар берган. Ариза бўйича барча ташкилотлар томонидан ижобий хулоса берилган ва банкка мурожаат этилиши сўралган. Лекин, банк томонидан ўз вактида кредит ажратилмаётганлигидан норози эканлиги билдирилган. Қабулхонанинг саъй-ҳаракати билан ушбу мурожаат ижобий ҳал қилинди.
Қабулхонага келиб тушган мурожатларни кўриб чиқишда камчиликларга йўл қўйган ваколатли органларга белгиланган тартибда таклифлар киритилиб, масъул ходимларга нисбатан тегишли чоралар кўрилди. Хусусан, муддати ўтган ва мурожаатчиларга асоссиз жавоб қайтарилган мурожаатлар бўйича масъул ташкилотларга тегишли тартибда 6 та тақдимнома ва таклиф киритилиб, 8 та ходимга “ҳайфсан” интизомий чораси кўрилган. Ўтган йил мобайнида Нукус шаҳридаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари томонидан 354 та тадбиркорлик субъекти иштирокида 29 та сайёр қабул ташкил этилди. Ушбу қабулларда тадбиркорлардан келиб тушган мурожаатларнинг аксарияти ижобий ҳал этилишига эришилди. Нукус шаҳри ҳокими билан қабул қилинган кўчма қарор асосида шаҳарда Тадбиркорларнинг жамоатчилик кенгаши ташкил этилган бўлиб, бугунги кунда ўз фаолиятини юритмоқда. Жамоатчилик кенгаши таркиби фаол тадбиркорлар, ҳуқуқшунослар ва жамоатчиликнинг бошқа вакиллари орасидан сайлаб олиб шакллантирилди.
Тадбиркорларнинг жамоатчилик кенгаши билан ҳамкорликда ўтказилган йиғилишларда қабулхонага келиб тушган мурожаатлар таҳлил қилиниб, тадбиркорларни қийнаётган масала ва тизимли муаммолар муҳокама қилинмоқда. Бундан ташқари, тадбиркорликни ривожлантиришга ва чет эл инвестицияларини жалб этишга тўсқинлик қилаётган тизимли муаммолар мониторинг ва таҳлил қилинмоқда. Бу соҳалардаги қонун ҳужжатларини такомиллаштириш бўйича мунтазам таклифлар тайёрланиб, кичик бизнес ва тадбиркорликни ривожлантириш агентлигига киритиб борилмоқда. Бугунги кунга қадар тадбиркорликни ривожлантиришга тўсиқ ва ғов бўлаётган муаммоларни бартараф этиш бўйича 73 та таклиф тақдим қилинди.
Довуд Абибуллаев, ЎзА