Бугунги кунда бозор муносабатлари шароитида амалга оширилаётган фаол инвестиция сиёсати, эркинлаштирилган ташқи савдо ва валюта операциялари ҳақиқий бозор иқтисодиётида соғлом рақобат муҳитини шакллантиряпти. Қайд этиш керак, иқтисодий бу жараён ҳар бир тармоқ олдига ривожланишнинг устувор йўналишларини белгилаб бермоқда.

Хусусан, божхона тизимига ҳам. Бу борада соҳа ходимлари хорижий тажрибадан келиб чиқиб, божхона постларида фаолиятни янада эркинлаштирмоқда. Натижада, тадбиркорларнинг вақти ҳамда харажатлари тежалмоқда. Мақсад экспорт салоҳиятини ошириш, экспортёр корхоналар учун қулайликлар яратиш ва уларга амалий ёрдам кўрсатишдан иборат.  

Тошкент шаҳар божхона бошқармасининг “Аркбулоқ” ташқи иқтисодий фаолият божхона пости ходимлари корхоналарга амалий ёрдам бериш, уларга божхона соҳасида амалга оширилаётган ислоҳотлар, қабул қилинаётган норматив-ҳуқуқий ҳужжатларнинг мазмун-моҳиятини етказиш, уларни қийнаётган муаммоларни аниқлаш мақсадида экспортёр корхоналар фаолияти билан яқиндан танишмоқда.  

Масъулияти чекланган жамияти шаклидаги йирик салқин ичимликлар ишлаб чиқарувчи корхоналардан бирининг фаолияти ўрганилди. Ташкил этилганига салкам 20 йил бўлган корхонада бугунга келиб, 400 дан ортиқ иш ўрни яратилган. Божхона имтиёзларидан фойдаланган ҳолда Германия давлатидан келтирилган  технологик ускуналар ўрнатилган. Жорий йилнинг ўтган даври мобайнида корхона томонидан 396,5 минг долларлик товар Тожикистон ва Қиғризистон давлатларига экспорт қилинган.  

Пост ходимлари тадбиркорлик субъектларининг ташқи иқтисодий фаолият жараёнларини амалга оширишдаги муаммолари билан қизиқди. Шунингдек, уларга божхона соҳасида янги қабул қилинган меъёрий ҳужжатлар талаблари етказилди. Учрашувда пост ходимлари тадбиркорларга доимо кўмак беришга тайёрлигини билдирди.  

Жорий этилаётган барча чора-тадбирлар тадбиркорлик ва ишбилармонлик муҳитини қўллаб-қувватлаш, уларнинг эркин фаолият юритишларини таъминлаш, қолаверса, ички бозорни рақобатбардош маҳсулотлар билан тўлдирган ҳолда экспорт ҳажмини кескин оширишга замин яратади.  

Ш.Маматуропова, ЎзА