Шу кунларда Бизнес-омбудсман томонидан назорат қилувчи органларнинг тадбиркорлик субъектларига нисбатан таъсир чораларини қўллаш амалиёти мунтазам равишда таҳлил қилиб борилмоқда.

Ўрганишларда аниқланишича, айрим назорат қилувчи органлар тадбиркорларга нисбатан маъмурий чора кўришда Маъмурий жавобгарлик тўғрисидаги кодекс талабларига амал қилмасдан ваколат доирасидан четга чиқмоқда.    

Маъмурий жавобгарлик тўғрисидаги кодекснинг 245-моддаси 3-бандида жиноят ишлари бўйича судлар якка тартибдаги тадбиркорлар ва (ёки) уларнинг ходимлари, юридик шахс бўлган тадбиркорлик субъектларининг мансабдор шахслари ва (ёки) бошқа ходимлари томонидан тадбиркорлик фаолиятини амалга ошириш чоғида содир этилган маъмурий ҳуқуқбузарликлар тўғрисидаги ишларни ҳам кўриб чиқиши белгиланган.    

Жумладан, Фарғона вилоятидаги айрим инспекцияларнинг мансабдор шахслари томонидан тадбиркорларга нисбатан расмийлаштирилган ҳужжатлар судларга юборилмасдан, ўзбошимчалик билан кўриб чиқилган ва жазо қўллаш тўғрисида қарорлар қабул қилинган.    

Бизнес-омбудсман томонидан киритилган хулосалар асосида 8 та ҳолатда йўл қўйилган қонунбузилишлари бартараф этилди ва инспекция томонидан ноқонуний чиқарилган маъмурий қарорлар бекор қилинди.    

Гулноза Бобоева,

ЎзА