Тошкент вилоятида Халқ банки масъул ходимлари томонидан аҳоли учун сайёр қабул бўлиб ўтди. Унда 100 га яқин тадбиркорнинг мурожаати ўрганилди.

Сайёр қабулда Халқ банки раҳбарияти фуқаронинг масаласи ижобий ҳал қилинишига кўмаклашишини билдирди. Мурожаатлари билан келган тадбиркорларга енгиллик яратиш йўллари муҳокама қилинди.

Хусусан, аҳоли ва тадбиркорлар банк-молия, солиқ тўловлари, кадастр, савдо-сотиқ, фаолиятини кенгайтириш, шунингдек, кредит олиш ёки қайтариш масалаларида юзага келган муаммолар кўриб чиқилди.

Жумладан, зангиоталик тадбиркор Муҳаббат Пардаева вилоятдан келган ишчиларга арзон нархдаги меҳмонхона қуриш учун 2019 йилда Халқ банкидан 3,5 миллиард сўм кредит олган. Қурилиш жараёнида кадастр билан боғлиқ муаммолар юзага келганлиги сабабли меҳмонхона белгиланган муддатда эмас, 2022 йилнинг апрель ойида фаолиятини бошлайди. Ҳозирги кунда тадбиркор кредитни қайтаришга қийналаётганлиги учун тўлов муддатини узайтиришни сўраб мурожаат қилган.

Учрашувда муҳокама қилинган бошқа масалалар бўйича ҳуқуқий тушунча ва маслаҳатлар берилди.

Гулноза Бобоева, ЎзА