Бухоролик ўн нафар тадбиркорлар Президентимизнинг жорий йил 18 августда қабул қилинган “Тадбиркорлар куни муносабати билан соҳа вакилларидан бир гуруҳини мукофотлаш тўғрисида”ги Фармони ҳамда “Фаол тадбиркор” кўкрак нишони билан тақдирлаш тўғрисида”ги фармойишига кўра юксак мукофотга лойиқ топилди.

Бугун Бухоро вилоятидан давлат мукофотларига муносиб кўрилган икки нафарига медаллар, етти нафар ишбилармонга “Фаол тадбиркор” кўкрак нишони тантанали тарзда топширилди. 

Тадбирда Бухоро вилоят ҳокими, Олий Мажлис Сенати аъзоси Ботир Зарипов соҳа жонкуярларини яқинлашиб келаётган Ватанимиз мустақиллигининг 34 йиллиги ва “20 август – Тадбиркорлар куни” билан табриклади ва вилоят ижтимоий-иқтисодий ҳаётида хусусий тадбиркорликнинг ўрни ва аҳамияти беқиёс эканлигини таъкидлади.

Эътироф этилганидек, сўнгги йилларда тадбиркорликни қўллаб- қувватлаш, қулай бизнес муҳитини шакллантириш мамлакат тараққиётининг устувор мезонларидан бирига айланганлиги бугун халқимизнинг фаровон турмушида ўз ижобий натижасини бермоқда. 

Сўнгги йилларвилоятда ялпи ҳудудий маҳсулот ҳажми  19,5 триллион сўмни ташкил қилган бўлса, бугунги кунда ушбу кўрсаткич  71,5 триллион сўмга етди. Шундан кичик бизнеснинг улуши 51,1 триллион сўм кўринишига келди.

Шу билан бирга, бугунги кунда вилоятда кичик бизнеснинг улуши саноатда  41, чакана савдода 91, хизмат кўрсатишда 68,4, қурилишда 42,5 ҳамда қишлоқ хўжалигида 96,4 фоизни ташкил этмоқда. Вилоятда экспортнинг 100 фоизи айнан тадбиркорлар томонидан амалга оширилмоқда.

[gallery-24828]

Ўтган даврда тадбиркорлик субъектларининг сони 13 минг 646  тадан 37 минг 608 тага етиб,  2,8 бараварга ошди. Улар томонидан 2017 йил якуни билан 20 минг 551 та янги иш ўринлари яратилган бўлса, 2024 йил якунида бу кўрсаткич 30 минг 546 тага етди.

Тадбирда сўзга чиққан тадбиркорлар давлат раҳбари томонидан кўрсатилган эътибор, ғамхўрлик ва рағбат учун миннатдорлик изҳор этди.

Зариф Комилов, Тоҳиржон Истатов (сурат), ЎзА мухбирлари.