Бизнес-омбудсманнинг Пахтакор туман халқ таълими бўлимидан қарздорликни ундириш юзасидан киритган даъво аризаси бўйича Дўстлик туманлараро иқтисодий судининг қарори билан Пахтакор туман халқ таълими бўлимига “Қурилиш” МЧЖ (номи ўзгартирилган) фойдасига 314 миллион сўмдан ортиқ қарзни тўлаб бериш мажбурияти юклатилди.

Бизнес-омбудсман ахборот хизматининг маълумотларига кўра, мазкур қарздорлик тадбиркор ва таълим бўлими ўртасида тузилган пудрат шартномаси бўйича юзага келган. Тарафлар ўртасида тузилган шартнома ҳудудий ғазначилик бўлинмаларидан рўйхатдан ўтмаганлиги ва шу сабабли шартнома кучга кирмаганлиги аниқланди. Натижада тадбиркор томонидан ҳақиқий бўлмаган битим бўйича ишлар амалга оширилган.  

Бундай ҳолатларда тарафларнинг ҳар бири бошқасига битим бўйича олган ҳамма нарсани қайтариб бериши, олинган нарсани аслича қайтариб бериш мумкин бўлмаганида эса, унинг қийматини пул билан тўлаши шарт.  

Маълумки, Бизнес-омбудсманнинг амалиётида давлат органлари тадбиркорлардан қарздор бўлиш ҳолатлари кўп аниқланади. Статистикага кўра, 2021 йилнинг август ойи ҳолатига Бизнес-омбудсманнинг фаолияти натижасида судлар орқали тадбиркорлар фойдасига 7, 8 миллиард сўмлик маблағлар давлат органларидан ундирилиши белгиланган.  

Гулноза Бобоева, ЎзА