Кимёхон Зокирова Фарғона вилояти Қўштепа туманининг “Бўстон” маҳалла фуқаролар йиғинида яшайди.

Турмуш ўртоғи вафот этганлиги туфайли қарамоғидаги уч фарзандини ёлғиз тарбияламоқда.  

У маҳалладаги “Аёллар дафтари”га киритилган. Мавсумий иш билан бандлиги ортидан топгани рўзғорга аранг етади. Тикувчиликка уқуви бор. Агар бир нечта тикув машинаси бўлса, тадбиркорлик қилиб рўзғорнинг бир томонини шунинг ортидан кўтариши мумкин.  

Кимёхон билан суҳбатлашган Халқ банкининг туман филиали мутасаддилари унинг таклифини қўллаб-қувватлади. Ўттиз миллион сўм имтиёзли кредит маблағи ҳисобига 6 та тикув машинаси харид қилди. Маҳаллада бўш турган дўконни ижарага олиб, шу жойда фаолиятини йўлга қўйди.  

Туман ҳокими Илёс Новиков тикувчилик цехининг очилишида иштирок этиб, аёлнинг режалари билан танишди. Опа цехни кенгайтириш ва қўшимча ишчи ўринлари яратиш ниятида. Кимёхон Зокирова тадбиркорлик фаолиятини йўлга қўйиб, 6 та ишчи ўрни яратди. Ҳатто ўзи сингари “Аёллар дафтарида”ги беш нафар аёлларни иш билан таъминлади. Тадбиркор аёл дўконнинг бўш турган хоналаридан ҳам унумли фойдаланмоқда. Ўзи чевар бўлганлиги учун маҳалладаги 15 нафар қизларга тикувчилик йўналиши бўйича ўқув курси ҳам ташкил этди.  

Маҳалладаги бежиримгина тикувчилик цехида буюртма асосида аёллар кийими тикилади. Кимёхон шу кунгача уй шароитида ўзи мустақил фаолият юритиб келаётган эди. У тиккан қуроқ ёстиқ ва якандозларнинг харидори қўшни Қирғизистон Республикасидан. Қалб қўри ва меҳрини бериб тиккан қуроқ якандоз ва ёстиқ жамланмасининг нархи 1 миллион сўмгача сотилади.

– Қуроқдан тикилган битта жамламамизда 4 дона якандоз ва 4 дона ёстиқ бўлади, – дейди опа. – Ҳозирда Қирғизистондан 500 дона қуроқ якандоз ва 500 дона ёстиққа буюртма келган. Қолаверса, бу буюртмани Қорақалпоғистон Республикасидан ҳам олдик. Олдин битта ўзим ҳаракат қилган бўлсам, энди кўплашиб ишлаймиз. Даромадимиз ҳам шунга яраша бўлади, албатта.

Ҳа, интилган киши ўз мақсадига эриша олади. Ҳеч қачон бировнинг қўлига қараб қолмайди. Кимёхон опа сингари хотин-қизлар буни амалда исботламоқда.

                                                                                                                                   М.Сулаймонов, ЎзА