Мазкур фотокўргазманинг асосий мақсади — жамият ва ҳар бир инсоннинг эътиборини атроф-муҳит муаммоларига қаратиш, шунингдек, барчамизга сайёрамиз ва унинг экотизимлари олдидаги масъулиятимизни эслатишдир.

Экспозицияда Ўзбекистоннинг сув ресурслари, тупроғи, флора ва фаунаси, турли ландшафтлари ҳамда табиат ёдгорликларини акс эттирган 60 та фотоасар намойиш этилмоқда.

Фотокўргазма атроф-муҳитга онгли, эҳтиёткор ва ҳурматли муносабатни шакллантиришга хизмат қилади. Унда профессионал ва ҳаваскор фотомухлислар томонидан суратга олинган, қўриқланадиган ҳудудларнинг манзаралари, ҳайвонот дунёси ва ўсимликлари тасвирланган.

Шунингдек, тадбир доирасида Экология ва иқлим ўзгариши миллий қўмитаси томонидан чоп этилган “Ўзбекистон табиий мероси” ҳамда “Ўзбекистон табиати фаслларда” номли албом-китоблар тақдимоти ҳам ўтказилмоқда. Ушбу нашрлар давлат экологик сиёсатининг мазмунини ёритиб, мамлакатнинг табиий ёдгорликлари, қўриқхоналар ва миллий боғлари ҳақида илмий тадқиқотларга асосланган маълумотларни тақдим этади.

Фотокўргазма экология ва барқарор ривожланиш мавзуларига қизиқадиган кенг жамоатчилик, профессор-ўқитувчилар, талабалар, мактаб ўқувчилари, ҳамда табиатни муҳофаза қилиш ва экологик маданиятни ривожлантириш билан шуғулланувчи мутахассислар учун муҳим манба бўлиб хизмат қилади. 

<iframe width="640" height="420" src="https://www.youtube.com/embed/YBxvyHSD0Qs" title="Tabiatning 60 manzarasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Фардона Яхшибоева, Ойбек Давронов, Улуғбек Тўхтаев (видео), ЎзА