Tog‘li hududlardagi ta’lim muassasalarini isitish uchun ko‘mir zaxirasi jamg‘arilmoqda
Namangan viloyatida ijtimoiy va iqtisodiyot tarmoqlarining 2016-2017-yillar kuz-qish davrida barqaror ishlashini ta’minlashga alohida e’tibor qaratilmoqda.
Namangan viloyatida ijtimoiy va iqtisodiyot tarmoqlarining 2016-2017-yillar kuz-qish davrida barqaror ishlashini ta’minlashga alohida e’tibor qaratilmoqda.Viloyat o‘rta maxsus, kasb-hunar ta’limi boshqarmasi tizimida 108 kasb-hunar kolleji va 10 akademik litsey faoliyat ko‘rsatmoqda. Mazkur ta’lim muassasalaridan 9 tasi markazlashgan issiqlik tizimi orqali isitiladi, 109 tasi o‘zining alohida isitish qozonxonasiga ega.
Mavsum mobaynida isitish tizimi usluksizligini ta’minlashga alohida e’tibor qaratilmoqda. Markazlashgan issiqlik tizimiga ulangan 9 ta’lim muassasasi, jumladan, Namangan yuridik kolleji va Davlatobod yengil sanoat kasb-hunar kollejida ikkita qozonxona qurilib, sakkizta yangi qozon o‘rnatilmoqda. Namangan shahar ijtimoiy-iqtisodiyot va pedagogika kolleji qozonxonasidagi ikkita qozon yangisiga almashtirildi. Mingbuloq maktabgacha ta’lim va xizmat ko‘rsatish kasb-hunar kollejiga KVT-80 rusumli, Uychi tumanidagi G‘ayrat pedagogika kollejining o‘quvchilar turar joyiga ikkita yangi isitish qozonlari o‘rnatildi.
Borish qiyin bo‘lgan tog‘li hududlardagi kasb-hunar kollejlari va litseylarni isitish uchun yetarlicha ko‘mir zaxirasi jamg‘arilmoqda.
– Yoqilg‘i zaxirasini yaratish uchun zarur mablag‘ to‘liq ajratilgan, – deydi viloyat o‘rta maxsus, kasb-hunar ta’limi boshqarmasi ta’lim muassasalarini rekonstruksiya qilish, mukammal ta’mirlash va jihozlash sho‘basi mudiri Mashrabjon To‘xtaboyev. – Ko‘mir yetkazib beruvchi “Distribyutor plyus” unitar korxonasiga 30 foiz mablag‘ o‘tkazib berilgan. Bugungi kungacha 4 ming 600 tonnadan ziyod yoki rejaga nisbatan 60 foiz ko‘mir yoqilg‘isi jamg‘arildi. 6 ta’lim muassasasini 180 tonna suyuq yoqilg‘i bilan ta’minlash bo‘yicha neft mahsulotlari korxonalari bilan shartnomalar imzolangan. Ayni paytda tizimdagi barcha ta’lim muassasalarida kuz-qish mavsumiga tayyorgarlik ishlari belgilangan tadbirlar rejasi asosida davom ettirilmoqda.