Suv polosi: Vakillarimiz Rossiya ochiq chempionatida qatnashmoqda
Shu kunlarda Rossiya Federatsiyasi Chelyabinsk viloyatining Zlotaust shahrida suv polosi bo‘yicha ayollar jamoalari o‘rtasida o‘tayotgan ochiq chempionatning 1/2 tur o‘yinlarida Rossiyaning 4 ta, Qozog‘istonning bitta jamoasi qatorida O‘zbekiston suv polosi terma jamoasi ham ishtirok etmoqda.
Suv polosi bo‘yicha O‘zbekiston terma jamoasi a’zolari kecha, 9 noyabr kuni musobaqaning ilk o‘yinini Qozog‘istonning “Ayshi Bibi" (Taraz) jamoasiga qarshi o‘tkazdi. Qiziqarli o‘tgan uchrashuvda vakillarimiz 8:20 hisobida imkoniyatni boy berib qo‘ydi.
Yurtimiz suv polochilari bugun, 10 noyabr kuni Dinamo-Uralochka (Zlatoust) bilan bahs yuritsa, 11 noyabrda Spartak-Volgograd jamoasiga qarshi maydonga tushadi. 12 noyabrda esa Yugra (Xati-Mansiysk) jamoasi qarshiligini yengishiga to‘g‘ri keladi.
Rossiya ochiq chempionatining 1/2 tur o‘yinlari 13 noyabrga qadar davom etadi.
T. Ro‘ziyev, O‘zA