Юртимизда илк бора синхрон сузиш бўйича “Сув париси” биринчи очиқ Марказий Осиё Чемпионати ўтказилмоқда.

Ўзбекистон Касаба уюшмаларининг “Сув спорти саройи”да ташкил этилган халқаро мусобақаларда Марказий Осиё давлатлари ҳамда Россия, Беларусь Республикаси, Болгария, Бирлашган Араб Амирликлари, Қозоғистон каби  давлатлардан 205 нафар спортчи иштирок этяпти.  

U12, U15 ва катта ёшдагилар ўртасида бўлиб ўтаётган мусобақаларда жами 186та медаль жамғармаси учун баҳс олиб борилади.  Ушбу чемпионатда Ўзбекистон шарафини 66 нафар спортчи ҳимоя қилади.  

15 май куни синхрон сузиш бўйича бошланган баҳсларда 12-15 ёшли спортчиларнинг чиқишлари бўлиб ўтмоқда. Шу куннинг ўзида катталар ҳам сув спортида куч синашади ва ғолиблар аниқланиб, тақдирлаш маросимлари ташкил этилади.  

Ҳар бир йўналиш бўйича спортчилар 3та: олтин, кумуш ва бронза медаллари учун кураш олиб боради. Кечга яқин мусобақаларнинг тантанали очилиш ва тақдирлаш маросимлари ташкил этилади. Ушбу баҳсларни сув спорти мухлислари маҳаллий телеканаллар орқали ҳам тўғридан-тўғри кузатиб боришлари мумкин.  

Эслатиб ўтамиз, “Сув париси” биринчи очиқ Марказий Осиё чемпионати 17 май куни якунланади ва ғолиблар номи маълум бўлади.  

Муҳими ушбу мусобақалар маҳаллий спортчиларимиз  учун халқаро ареналарга чиқишларига трамплин вазифасини ўтайди.   

<iframe width="640" height="420" src="https://www.youtube.com/embed/6txyqpwjMF4" title="“Suv parisi”Markaziy Osiyo chempionatiga start berildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Нишонбой Абдувойитов (видео), ЎзА