Термизда спортнинг енгил атлетика тури бўйича ёшлар ўртасида Сурхондарё вилоят биринчилиги бўлиб ўтди.

Вилоят божхона бошқармаси ва Енгил атлетика федерацияси вилоят бўлими ҳамкорлигида ташкил этилган беллашув унинг олтита спорт тури бўйича ўтказилди.

Президентимиз бошчилигида 13 февраль куни Олимпия ва Паралимпия ҳаракати, ихтисослаштирилган ва оммавий спортни янги босқичга олиб чиқиш ҳамда аҳоли жисмоний фаоллигини ошириш чора-тадбирлари бўйича ўтказилган видеоселектор йиғилишида соҳадаги муҳим вазифалар белгиланиб, қатор ташаббуслар илгари сурилган эди. Шундан сўнг Божхона қўмитаси раиси Енгил атлетика федерацияси раиси этиб сайлангач, мамлакатимизнинг жанубдаги воҳасида ҳам спортнинг бу турини янада ривожлантиришга эътибор кучайтирилди. 

Вилоятда жорий йил ўтказилган илк беллашувда туманлар ва шаҳарда спортнинг шу тури билан шуғулланаётган ёшлар, ёш божхона ходимлари ҳамда вилоят божхоначиларига бириктирилган Термиз шаҳридаги 18-мактаб ўқувчилари иштирок этди. 

– Биз Ўзбекистон чемпионати учун 18 ёшгача бўлган ўғил-қизлар ўртасида саралаш мусобақасини ўтказяпмиз, –дейди Енгил атлетика федерацияси вилоят бўлими катта мураббийи Наталья Холодова. – Ярим мусобақа бўлиб ўтди ва спортчилар ажойиб натижалар кўрсатди. Улар тайёрланди, ҳаракат қилди, ишлади ва мен тренер сифатида жуда мамнунман ўқувчиларимдан. 

Шунингдек, Тожикистоннинг Хатлон вилоятидан ўзаро тажриба алмашиш учун келган ёш атлетлар ҳам мусобақани кузатиб борди.

– Мен Хатлон вилояти енгил атлетика федерацияси раҳбари ва бош мураббийиман, – дейди Тожикистон Республикаси Хатлон вилояти енгил атлетика федерацияси раҳбари Дилшод Мамадов. – Биз биринчи марта енгил атлетика бўйича Сурхондарё вилояти очиқ чемпионатида иштирок этяпмиз. Жуда чиройли беллашув бўлмоқда. Таассуротларимиз зўр. Бундан асосий мақсад спортчиларимизнинг маҳоратини ошириш ва ўзаро тажриба алмашишдан иборат. Келажакда икки давлат халқларининг дўстлик ришталарини янада мустаҳкамлаш ҳамда енгил атлетика спорт турининг жаҳон ареналарида нуфузини янада ошириш ва икки давлат байроғини юксакларга кўтариш учун астойдил ҳаракат қиламиз. Ўзбекистон олға, Тожикистон олға!, деймиз.

<iframe width="640" height="420" src="https://www.youtube.com/embed/PhyvA1gw5sg" title="Surxondaryolik yosh yengil atletlar kuch sinashdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Маълумотларга кўра, вилоятда 785 нафар ёш спортнинг енгил атлетика тури билан мунтазам шуғулланмоқда. Уларнинг 33 нафари Миллий терма жамоага киритилган. Олти нафар сурхондарёлик номзод енгил атлетиканинг олтита тури бўйича “Лос-Анжелес 2028” Ёзги Олимпия ўйинлари учун саралаб олинган.

Мусобақа якунида ғолиблар муносиб рағбатлантирилди. Улар беллашувнинг мамлакат босқичида иштирок этиш ҳуқуқини қўлга киритиб, Осиё ўйинлари йўлланмаси учун кураш олиб бориш имкониятига эга бўлди.

Холмўмин Маматрайимов, ЎзА мухбири