Сурхондарё вилоятининг мафтункор, турфа рангларда товланувчи табиат манзаралари ҳам сайёрамизнинг турли давлатларидан келган сайёҳларга хуш ёқади. Сайёҳлар тоғу далаларни, боғу зилол сувларни завқ билан томоша қилади.

Денов туманининг тоғли ва қадимий Сина қишлоғи ўзининг ана шундай табиат гўзалликлари, асрлардан буён инсониятни ҳайратга солиб келаётган мафтункор Сунбулаизор чашмаси билан донг таратган. 

Тоғлар қўйнидаги адирликнинг Соиминггон дарасига ўзгача гўзаллик, тароват таратиб турган бу маскан, айниқса, баҳор ва ёз фаслида Сунбула шайдолари билан гавжум бўлади. Бу ерга келиб, тошлар орасида ўсиб турган ям-яшил ўсимликка қиё боқсангиз, гўёки унсиз кўз ёши тўкаётгандек таассурот уйғотади. Сунбулалар томирини силаб, сизиб чиқаётган муздеккина зилол сув қалбингизга ором бахш этади. 

Синаликлар сирли табиат инъом этган сокин ва мафтункор гўша билан фахрланади. Бу ерни муқаддас зиёратгоҳ сифатида қадрлаб, сунбулалар орасида бир зайлда томчилаб турадиган сувни шифобахш неъмат сифатида таърифлайди: 

– Мана турган жойимиз Сунбулаизор, деб аталади,–дейди синалик меҳнат фахрийси Амирқул Ибоев. – Бу жуда-жуда қадимий зиёрат жой бўлиб, бу масканга халқимиз қадам қўйиб, шифобахш суви, манзарасидан фойдаланиб юради. Доим бу ерга сайёҳлар оқиб келади. Сунбулаизор аталганининг сабаби, бу ер шундай мўъжизали жойки, тепадан келганда ҳеч ким ўйламайди– қуруқлик. Лекин пастга тушганда инсон зоти гувоҳ бўладики, мана бу сумбула ичидан кўз ёши томчилаб, сув оқиб туради. Бу масканимиз маданий мерос объектига кирган. Бу жой келажакда туризм мақомини олиб, қишлоғимиз янаям обод бўлади. 

Бу сувнинг шифобахшлиги ошқозон-ичак, буйрак касаллигига даво. Одамлар келиб, дардларига шифо топиб кетади. Яна ҳам бошқа касалликларга шифобахшлиги учун нафақат Ўзбекистон Республикамиздан, балки Тожикистон, қўшни бошқа давлатлардан зиёратчилар келади. Аммо озгина йўллари талабга жавоб бермайди. Умид қиламизки, келажакда албатта йўлларимиз равон бўлади ва зиёратчиларимиз оқими янада кўпаяди. 

Ҳисор тоғ тизмаларида салқин, кишини жунжиктирадиган шабада эсиб, хазонрез куз келаётганидан дарак бераётган шу кунларда Сунбулаизор сайёҳлар қадами камайганидан унсиз кўз ёши тўкаётганга ўхшайди, гўё. Мабода йўлингиз тушиб, Сурхон тарафларга келиб қолсангиз, Сина қишлоғидаги Сунбулаизорни ҳам мириқиб томоша қилинг. Тинимсиз томчилаётган шифобахш оби-ҳаёт ва сунбулалардан завқу шавқ олиб, мусаффо ҳавоси ҳамда зилол сувидан баҳраманд бўлинг. Она табиатнинг буюк заковати ва тенгсиз куч-қудратига ўзингиз баҳо беринг. 

<iframe width="650" height="420" src="https://www.youtube.com/embed/lXJVUne_A2w" title="Сурхондарёдаги Сунбулаизорда бўлганмисиз?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Холмўмин Маматрайимов, ЎзА мухбири