Termizda Milliy gvardiya Surxondaryo viloyati bo‘yicha qo‘riqlash boshqarmasi, viloyat sportni rivojlantirish bosh boshqarmasi va “Mahalla” xayriya jamoat fondi viloyat bo‘limi hamkorligida sportning kamondan otish turi bo‘yicha o‘smir yoshlar o‘rtasida qo‘riqlash boshqarmasi boshlig‘i kubogi musobaqasi o‘tkazildi.
Musobaqa ochilishida Milliy gvardiya Surxondaryo viloyati bo‘yicha qo‘riqlash boshqarmasi boshlig‘i, podpolkovnik A.Umarov so‘nggi yillarda vohada sportning kamondan otish turini yanada rivojlantirish bo‘yicha amalga oshirilayotgan ishlar, erishilayotgan yutuqlar haqida atroflicha so‘z yuritdi. Bellashuv ishtirokchilariga omad tiladi.
Prezidentimizning 2021 yil 17 iyundagi “Kamondan otish sport turini yanada rivojlantirish va ommalashtirish chora-tadbirlari to‘g‘risida”gi qarori ijrosi doirasida Surxondaryo viloyatida buyuk ajdodlarimizdan meros bo‘lib qolgan mazkur sport turini keng targ‘ib etish, yoshlarning qiziqishini oshirish bo‘yicha muayyan ishlar amalga oshirilmoqda. Termiz shahri va tumanlarda 18 ta kamondan otish sport to‘garaklari faoliyati yo‘lga qo‘yilib, moddiy texnik bazasi mustahkamlanmoqda. O‘g‘il-qizlarni mazkur sport turiga jalb etish, ularning merganlik mahoratini oshirish, nufuzli musobaqalarga tayyorlashga alohida e’tibor qaratilmoqda.
Qizg‘in va murosasiz bahslarga boy bo‘lgan bellashuvda musobaqaning tuman va shahar bosqichlarida g‘olib bo‘lgan yuzga yaqin havaskor kamonchi o‘z mahoratini namoyish etdi. Yakunda o‘g‘il bolalar o‘rtasida Termiz shahrilik Fariddin Muhammadqulov, qizlar bahsida jarqo‘rg‘onlik Yulduz Muhammadiyeva faxrli birinchi o‘rinlarni qo‘lga kiritdi. Ikkinchi o‘rin Muzrabot tumanilik Muhammadali Rashidov va O‘g‘iloy Boynazarovaga, uchinchi o‘rin Angor tumanidan Asomiddin Ibragimov hamda Jarqo‘rg‘on tumani yosh kamonchisi Zarina Ziyodullayevaga nasib etdi.
G‘oliblar maxsus diplom, medal, musobaqa kubogi hamda qimmatbaho sovg‘alar bilan taqdirlandi. Shuningdek, eng mohir murabbiy va chaqqon havaskor kamonchilarga musobaqa tashkilotchilarining esdalik sovg‘alari topshirildi.
Xolmo‘min Mamatrayimov, O‘zA