Surxondaryo viloyatidagi avtomobillarga gaz to‘ldirish kompressor shoxobchalari ish rejimi o‘zgardi. Ular ertalab soat 8:00 dan 17:00 gacha transport vositalariga gaz to‘ldirish xizmati ko‘rsatish tartibiga o‘tdi.

Qishning sovuq kunlari aholi xonadonlari, tibbiyot muassasalari, maktab va maktabgacha ta’lim tashkilotlari hamda boshqa ijtimoiy soha ob’ektlarini barqaror tabiiy gaz bilan ta’minlash uchun avtomobillarga gaz to‘ldirish kompressor shoxobchalari ish rejimiga cheklov kiritildi.  

"Hududgaz Surxondaryo" gaz ta’minoti filialidan ma’lum qilishlaricha, shuningdek, tabiiy gazdan debitor qarzdorligi mavjud 28 ta metan gaz quyish shoxobchasi vaqtincha tarmoqdan uzib qo‘yilgan. Yuzaga kelgan qarzdorlik bartaraf etilgach, mazkur avtomobillarga gaz to‘ldirish kompressor shoxobchalari belgilangan tartibda xizmat ko‘rsatishni boshlaydi.  

Xolmo‘min Mamatrayimov, O‘zA muxbiri