Сурхондарё вилояти юқумли касалликлар шифохонасида ҳозиргина коронавирус инфекциясидан бутунлай тузалган 7 нафар бемор маҳаллий ҳокимлик, соғлиқни сақлаш бошқармаси ва бошқа мутасадди ташкилотлар вакиллари иштирокида реабилитацияга кузатилди.

Уларнинг 5 нафари жорий йилнинг 28 март куни Москва-Термиз чартер рейси билан вилоятга келиб, карантин муддатини ўтаётганида касаллик аниқланган юртдошларимиз ва икки нафари Россия давлатидан транзит йўналишида келган ҳайдовчилардир.

Тажрибали шифокорларнинг самарали муолажалари асосида даволаниб, касалликни тез енгиб ўтганларнинг бир нафари Қорақалпоғистон Республикаси, бир нафардан Бухоро, Фарғона вилоятлари ва Тошкент шаҳрилик ватандошларимиз, уч нафари сурхондарёликлар бўлиб, энг кичиги 20, каттаси 49 ёшда.

– Ўта хавфли касаллик билан туну кун курашиб, бизни ҳаётга қайтарган тиббиёт ходимларига мингдан-минг раҳмат, – дейди сурхондарёлик юртдошимиз. – Дард оғир бўлганда одамнинг кўзига ҳаёт жуда ҳам ширин, бошингизда кўз-қулоқ бўлиб турган инсон ниҳоятда азиз бўлиб кўринар экан. Бизга бу дунёнинг улуғ неъматини қайта ином этган шифокорларга бошимиз ерга теккунча таьзим қиламиз. Бахтимизга фидойи тиббиёт ходимларимиз ҳамиша соғ,омон бўлсин. Бу офат ер юзидан тезроқ чекинсин.

Вилоят соғлиқни сақлаш бошқармаси маълумотларига кўра, айни пайтда Термиз шаҳридаги юқумли касалликлар шифохонасида яна 15 бемор даволанаётир. Уларнинг аҳволи яхши бўлиб, муолажалар белгиланган стандартлар ва видеомаслаҳатлашувлар асосида малакали шифокорлар томонидан олиб борилмоқда. Воҳада пандемиядан буткул соғаяётганлар сафи кун сайин ўсиб бораётган бўлса-да, мутахассислар ҳали аҳолининг хотиржам бўлишига эрта эканини таькидлаб, вилоят аҳлидан амалдаги карантин қоидаларига қатьий риоя этиш, ўзи ва ўзгалар соғлигига бефарқ бўлмай, уйда қолишни сўрамоқда.

Инфекцияга чалинган беморларнинг яна бир гуруҳи яқин кунларда тўлиқ соғайиб, реабилитацияга чиқиши кутилмоқда.