Сурхондарё вилояти юқумли касалликлар шифохонасида коронавирусдан тўлиқ соғайган етти нафар бемор реабилитацияга чиқарилди.

Уларнинг барчаси жорий йилнинг 28 март куни Москва-Термиз чартер рейси билан вилоятга келиб, карантин муддатини ўтаётганида касаллик аниқланган фуқаролардир.

Касалликдан буткул соғайганларнинг энг кичиги 20, каттаси 34 ёшда бўлиб, икки нафари Сурхондарё, бир нафари Қашқадарё, Фарғона, Наманган, Самарқанд ва Тошкент вилоятилик юртдошларимиздир.

Вилоят соғлиқни сақлаш бошқармасидан маълум қилишларича, айни пайтда мазкур шифохонада 22 бемор даволанмоқда. Барчасининг аҳволи қониқарли. Яқин кунларда касалликдан тўлиқ тузалган яна бир гуруҳ юртдошларимизни тантанали кузатиш мўлжалланмоқда.

Самарали даволаш усуллари ёрдамида дарддан бутунлай фориғ бўлган ватандошларимиз вилоят ҳокимлиги, вилоят соғлиқни сақлаш бошқармаси ва бошқа мутасадди ташкилотлар вакиллари иштирокида кузатилди.