Футбол бўйича Ўзбекистон Суперлигасининг 9-тур учрашувлари ҳам ўз якунига етди. Мазкур турда бир қатор учрашувлар дуранг ҳисобида якунлангани ушбу мусобақада иштирок этаётган жамоаларнинг ўйин услублари янгича кўриниш олаётгани ва уларнинг ўйин савияси ўсаётганидан далолат.

Суперлиганинг 9-туридан ўрин олган сўнгги учрашувда «Локомотив» ва «Сурхон» жамоалари майдонга тушди ва ушбу баҳс 1:1 ҳисобида якунланди. Умуман олганда бу турда фақатгина «Нефтчи» ҳамда «Сўғдиёна» клублари ғалаба қозониб, 3 очкони қўлга киритди.  

Жумладан, 10-тур учрашувлари бошланишидан аввал «Навбаҳор», «Насаф» жамоалари бир хил – 16 очко тўплаган ҳолда жадвални бошқармоқда. «Андижон», «ОКМК», «Сўғдиёна» ва «Нефтчи» 14 очко билан кейинги ўринларга кўтарилди. Шунингдек, «Пахтакор» 12 очко жамғариб, 7-ўриндан жой олган. «Қизилқум» 10, «Локомотив» ва «Сурхон» ҳам бир хил – 9 очко жамғарган ҳолда кучли ўнликка жойлашди. «Олимпик» жамоаси 8 очко билан 11-ўринда бораётган бўлса, қуйи поғоналарда «Динамо», «Бунёдкор», «Металлург» ўрин олган.  

Ушбу турдан ўрин олган «Нефтчи» — «ОКМК» (1:0) баҳсини томоша қилиш учун «Истиқлол» стадионига 15 минг 120 нафар мухлис ташриф буюрди. Шунингдек, бу турда «Насаф» — «Динамо» ўйинини кўриш учун «Марказий» стадионга 7 минг 11 нафар мухлис келган бўлса, «Локомотив» — «Сурхон» учрашувини 698 нафар мухлис стадиондан кузатди.  

Ҳозирда Суперлига баҳсларида Тома Табатадзе ва Лупче Дориев 8 та гол урган ҳолда тўпурарлар жадвалини бошқариб бормоқда. Уларни Зоран Марушич 5 та гол билан таъқиб этиб бормоқда. «Андижон» жамоаси аъзоси Бектемир Абдуманнонов ўтган 9 турда жами 4 маротаба ассист қилди ва ҳозирда ушбу йўналиш бўйича чемпионатда унга тенг келадиган футболчи топилмаяпти.  

Эслатиб ўтамиз, Ўзбекистон Суперлигасининг 10-тур учрашувлари 30 май куни бошланиб, 2 июнь кунига қадар давом этади.  

Жавоҳир Тошхўжаев,

ЎзА