Футбол бўйича Ўзбекистон Суперлигасининг 6-тури ҳам ўз якунига етди. Тур доирасида фақатгина «Олимпик» ва «Динамо» клублари ўртасидаги баҳс бошқа кунга қолдирилди.
Олтинчи турнинг сўнгги икки учрашувида "Насаф" – "ОКМК", "Пахтакор" – "Металлург" жамоалари ўзаро рақобатлашди. Айнан ушбу учрашувлар турнинг энг қизиқарли ва голларга бой ўйини бўлди. Қаршининг "Насаф" клуби сафарда «ОКМК»ни 4:3 ҳисобида мағлубиятга учратган бўлса, "Пахтакор" ўз майдонида "Металлург"дан 4:3 ҳисобида устун келди.
Шунингдек, 6-турда «Андижон» — «Сўғдиёна» 0:1, «Навбаҳор» — «Локомотив» 4:0, «Бунёдкор» — «Сурхон» 0:2 ва «Қизилқум» — «Нефтчи» 1:1 натижалари қайд этилди. Мазкур турда ўтказилган ушбу ўйинларда жами 23 та гол урилди.
Ҳозирда Суперлига баҳсларида Тома Табатадзе — 6 та гол урган ҳолда тўпурарлар жадвалини бошқариб бораётган бўлса, Шоҳрух Абдураҳмонов ва Зоран Марушич 4 тадан гол билан уни таъқиб этиб турибди.
Клублар ўртасида энг кўп гол урган жамоалар жадвалини «Навбаҳор» клуби 12 та гол билан бошқараётган бўлса, энг кўп гол ўтказган клуб сифатида ўз дарвозасидан 13 та тўп олиб чиққан «Бунёдкор» жамоаси эътироф этилмоқда. «Нефтчи» клуби гарчи кўп гол ура олмаётган бўлсада, ўз дарвозасини яхши қўриқлаган жамоа сифатида олқишларга сазовор бўлиб турибди. Фарғона жамоаси ўтган 6 турда 5 та ўйин ўтказиб, бор-йўғи икки тўп ўтказиб юборди. Албатта, бу юқори натижа.
Миллий чемпионатимизнинг 7-тури олдидан «Андижон», «Сўғдиёна» ва «Насаф» жамоалари бир хил 11 очко тўплаган ҳолда жадвални бошқармоқда. Бироқ «Насаф» жамоаси битта ўйин кам ўтказган ҳолда мазкур натижани қайд этаётир. Водийнинг «Нефтчи» ва «Навбаҳор» клублари 10 ҳамда 9 очко жамғариб, 4 ҳамда 5-ўриндан жой олган.
Шунингдек, «Локомотив», «Қизилқум» ва «ОКМК» ҳам бир хил 8 очко жамғарган ҳолда, «Пахтакор», «Сурхон» эса 7 очкодан жамғариб, кучли ўнликка жойлашди. Қуйи поғоналарда «Олимпик» ва «Динамо» 4 очко билан, «Металлург» ҳамда «Бунёдкор» эса 2 очко билан бормоқда.
Маълумот ўрнида, Ўзбекистон Суперлига баҳсларининг 7-тури 11-14 май кунлари бўлиб ўтади.
Жавоҳир Тошхўжаев,
ЎзА