Google компанияси ва 40 йилдан бери дельфинлар устида илмий тадқиқотлар олиб бораётган Wild Dolphin Project (WDP) ташкилоти ҳамкорликда DolphinGemma номли сунъий интеллект (СИ) моделини ишлаб чиқди. Бу ҳақда Fox News нашри хабар берди.

Ушбу лойиҳа дельфин товушларини чуқур ўрганишга қаратилган бўлиб,  WDP  томонидан тўпланган катта ҳажмдаги тарихий аудио маълумотлар асосида ишлаб чиқилган.  WDP олимлари тўрт ўн йиллик давомида дельфинларнинг турли товушларни қандай вазиятларда ишлатишини ўрганиб келмоқда. Масалан, ҳуштак товуши оналар ва уларнинг болалари ўртасидаги алоқа воситаси сифатида хизмат қилади, пульсли чақириқ эса зиддиятли ҳолатларда — дельфинлар жанжаллашганда эшитилади. Шунингдек, ғувулловчи товушлар танишув ёки хавфли вазиятларда, масалан, акулаларни қувиб юборишда ишлатилади.

DolphinGemma модели ушбу товушларни таҳлил қилиб, уларни маънога эга бирликларга ажратишга қодир. Вақт ўтиши билан модел товушлар асосида сўзлар, жумлалар ёки ибораларни аниқлаш имкониятига эга бўлади. Бу эса дельфинлар тили луғатини яратиш йўлида муҳим қадам бўлиши мумкин.

Лойиҳа муаллифларига кўра, бу технология нафақат дельфинлар, балки бошқа ҳайвон турларининг коммуникациясини ўрганиш ва тушунишга ҳам замин яратади. Сунъий интеллект ёрдами билан инсон ва ҳайвонлар ўртасидаги мулоқотда мутлақо янги давр бошланиши мумкин. 

<iframe width="560" height="315" src="https://www.youtube.com/embed/iqbjd5srcA0?si=U-_XHBgVnxVFI57K" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА