Коррупцияга қарши курашиш агентлиги ҳамда Судьялар олий кенгаши ҳамкорлигида «Судьялар корпусини шакллантиришда коррупциянинг олдини олиш масалалари» мавзусида давра суҳбати ташкил этилди.

Коррупцияга қарши биргаликда курашилсагина кутилган самарага эришиш мумкин. Бу эса барча давлат органларидан изчил ҳамкорликни талаб қилади.

Касални даволагандан кўра, унинг олдини олиш муҳим бўлганидек, ҳар қандай иллатнинг барвақт олдини олиш унга қарши курашишнинг энг самарали усули ҳисобланади. Бунинг эса икки омили мавжуд, бу – очиқлик ва шаффофлик.

Судьялар олий кенгаши фаолиятида мана шу икки тамойилга алоҳида эътибор қаратилмоқда. Судьялик лавозимларига муносиб кадрларни танлаш ва муқобиллик асосида тайинлашда мутлақо янги тартиб ва талаблар жорий этилди. Бу жараёнда илғор ахборот технологияларидан фойдаланиш йўлга қўйилиши натижасида инсон омили кескин чекланди.

Давлатимиз раҳбарининг «Судьяларнинг чинакам мустақиллигини таъминлаш ҳамда суд тизимида коррупциянинг олдини олиш самарадорлигини ошириш чора-тадбирлари тўғрисида»ги фармонида эса Кенгаш фаолиятида очиқ ва шаффофлик устувор аҳамият касб этиши яна бир бор белгилаб берилди.

Тадбирда тизимдаги коррупциявий ҳуқуқбузарликларни келтириб чиқараётган омилларни аниқлаш, профилактика қилиш, турли тадқиқотларни амалга ошириш, илк судьяликка кадрларни тайёрлашда одоб-ахлоқ қоидалари ҳамда ҳалоллик бўйича ўқишларни ташкил этиш, жамоатчилик назоратини кучайтириш, шунингдек, мавжуд қонунчиликни такомиллаштириш каби масалаларга алоҳида эътибор қаратилди. Бу борада Судьялар олий кенгаши ва Агентлик ўртасидаги ҳамкорлик хусусида сўз юритилди.

Тадбир якунида Коррупцияга қарши курашиш агентлиги ва Судьялар олий кенгаши ўртасида ўзаро ҳамкорлик меморандуми имзоланди.

Шуҳрат Неъматов, ЎзА