Судан қуролли кучлари ва Тезкор ҳаракат кучлари ўт очишни тўхтатиш бўйича келишувни яна беш кунга узайтирди, деб хабар тарқатмоқда Al Arabiya телеканали.

Аввалроқ Армия ва Тезкор ҳаракат кучлари вакиллари Саудия Арабистонининг Жидда шаҳрида эришилган ўт очишни тўхтатиш бўйича келишувни узайтириш имкониятларини муҳокама қилишга тайёрлигини билдирган эди.

“Суданда ярашув муддатининг узайтирилиши гуманитар ёрдам кўрсатиш ва турли хизматлар фаолиятини тиклаш учун кўпроқ вақт беради”, – дейилади телеканал берган хабарда.

Суданда уришаётган томонлар ўртасида гуманитар ярашув муддати якшанба куни кечқурун ниҳоясига етган. Томонлар бир-бирини ушбу келишувнинг бузилишида айблаб келмоқда.

Жаҳон соғлиқни сақлаш ташкилотининг сўнгги хабари бўйича, Суданда кечаётган қуролли тўқнашувлар натижасида 702 киши ҳалок бўлган, 5 минг 687 киши жароҳат олган. Мамлакат врачлари касаба уюшмалари хабарига кўра, қуролли можаро 866 нафар тинч аҳоли ҳаётига зомин бўлган.

БМТнинг миграция бўйича халқаро ташкилоти (МОМ) эса уруш бошлангандан буён 319 минг киши мамлакатни тарк этгани ҳақида маълум қилган.