Суданда денге ауруы көбейіп келеді
Жыл басынан бері Суданда денге ауруының 1000-ға жуық жағдайы анықталған.
Судан денсаулық сақтау министрлігінің мәлімдемесінде қауіпті вирустан 11 адам қайтыс болғаны айтылған.
Хабарламаға сәйкес, инфекцияны жұқтыру жағдайы 8 штатта тіркелген. Аурудың басым бөлігі елдің шығысындағы Аль-Гедареф штатында анықталды.
Дүниежүзілік денсаулық сақтау ұйымының мәліметі бойынша, 15 сәуірден бері үкімет әскерлері мен жедел әрекет ету күштері арасындағы қақтығыстар жалғасып жатқан елдің шығысында тырысқақ және денге безгегі жағдайлары жиі кездесуде.
Судан медициналық қауымдастығы халықаралық ұйымдарды елге тырысқақ, денге, қызылша және безгек індеттерімен күресуге көмектесуге шақырған.