Собир Қаршиев Навоий вилояти Хатирчи тумани “Майдонсой маҳалласида туғилган. Унга 1978 йил 28 мартда тиббиёт муассасасидан ташқарида уй шароитида туғма кўзи ожиз ҳолатда туғилганлиги сабабли тиббиёт муассасаси томонидан туғилганлик ҳақида маълумотнома берилмаган.
Фуқаролик ишлари бўйича Хатирчи туман суди томонидан унинг туғилганлиги ҳақида фактни белгилаш, туғилганлик ҳақида маълумотнома мавжуд бўлмаганлиги сабаб фуқаролик паспортини олишда сарсон бўлаётганлигини билдириб, қилган мурожаати ўрганиб чиқилди.
Аниқланишича, 1975-1981 йиллардаги архив маълумотлари ўрганилганида С.Қаршиевга туғилганлик тўғрисида далолатнома расмийлаштирилмаган, кўзи ожизлиги учун таълимга жалб қилинмасдан қолиб кетган.
– Ўзбекистон Республикаси Вазирлар Маҳкамасининг 2016 йил 14 ноябрдаги 387-сонли қарори билан тасдиқланган “Фуқаролик ҳолати далолатномаларини қайд этиш қоидалари”нинг 19-бандида 16 ёшдан ошган тиббий муассасадан ташқарида ва тиббий ёрдамсиз туғилган болага нисбатан тиббиёт муассасаси томонидан туғилганлик ҳақидаги маълумотнома расмийлаштирилмаган шахсларнинг туғилганлигини қайд этиш суднинг ҳал қилув қарори асосида амалга оширилиши белгиланган, – дейди фуқаролик ишлари бўйича Хатирчи туман суди раиси Баҳодир Бабақулов. – Ўзбекистон Республикаси Фуқаролик процессуал кодексининг 295-моддасига кўра эса фуқаролар ёки ташкилотларнинг шахсий, мулкий ҳуқуқлари вужудга келиши, ўзгариши ёки тугашига сабаб бўладиган фактларни суд аниқлайди, суд жумладан оталикни тан олиш (белгилаш) фактини, боланинг у ёки бу онадан туғилганлиги, шунингдек, туғилган вақтини аниқлаш тўғрисидаги ишларни кўради. Суд иш ҳужжатларини ўрганиб, ишга гувоҳларни жалб қилган ҳолда уларнинг тушунтиришларини эшитиб, аризани қаноатлантиришни, фуқаро С.Қаршиевнинг 1978 йил 28 март кунида туғилганлик факти белгилаб беришни лозим топди.
Энди суднинг ҳал қилув қарори қонуний кучга киргач, фуқаро С.Қаршиевга тегишли тартибда ФҲДЁ бўлими томонидан туғилганлиги ҳақида далолатнома ёзуви қайд этилиб, шундан кейин унга фуқаролик паспорти ҳам берилади.
Абдували Бўриев, ЎзА