Subaru коронавирус туфайли ишлаб чиқаришни уч ҳафтага тўхтатади
Корпорациянинг 10 минг кишилик иш ўрни сақланади, дейди агентлик.
Япониянинг Subaru автомобиль ишлаб чиқариш корпорацияси фаолиятини қарийб уч ҳафтага тўхтатадиган бўлди, коронавирус тарқалиш таҳдиди шунга мажбур қиляпти, дейилади Киодо ахборот агентлигининг маълумотида.
Хабарда айтилишича, корпорация ушбу уч ҳафта давомида 70 мингта машина ишлаб чиқариши мумкин эди, аммо коронавирус пандемияси сабабли машина йиғишни 11 апрелдан 1 майгача тўхтатади. Корпорациянинг 10 минг кишилик иш ўрни сақланади, дейди агентлик.
Subaru корпорациясининг Гумма префектурасида жойлашган ушбу заводда Impreza ва Forester моделлари ишлаб чиқарилади. Мазкур моделлар ички ва Шимолий Америка бозорига мўлжалланган. Заводда ишлаб чиқарилаётган автомобиллар корпорация глобал савдосининг 70 фоизини ташкил этади.