Пойтахтимизда стол тенниси бўйича клублар ўртасида илк бор ўтказилаётган “Pro-Tur” мусобақаси юртимиздаги энг маҳоратли кичик ракетка усталарини жамлади.

Мусобақанинг очилиш маросимида иштирок этган Ўзбекистон Республикаси Президентининг спорт бўйича вакили Одил Абдураҳмонов, Спорт вазирлиги, Миллий Олимпия ва Паралимпия қўмиталари, мамлакат стол тенниси федерацияси мутасаддилари юртимизда ушбу спорт ривожини янги босқичга олиб чиқиш, маҳоратли кичик ракетка усталарини тайёрлаш борасида амалга оширилаётган ишлар хусусида тўхталиб, турнирлар, жамоавий мусобақаларни тизимли ташкил этиш муҳим аҳамиятга эга эканлигини таъкидлади.

Кичик ракетка усталари ўртасида ўтказилаётган турнирнинг асосий баҳсларида 12 та клуб ғолиблик йўлида кураш олиб борди.

Янги истеъдодларни кашф этиш ва уларни ривожлантириш учун ажойиб платформа вазифасини ўтаётган турнирнинг кеча ўтказилган саралашларида муваффақиятга эришган “Tashkent” ва “7SABER” жамоалари 1-гуруҳдан, “Central” ва “Dolina” жамоалари 2-гуруҳдан жой олди. “United” ҳамда “Shirin Stol Tennis Club” вакиллари плей-офф босқичига йўл олди.

Бугун, 30 ноябрь куни айнан ушбу жамоалар мукофот жамғармаси 400 миллион сўмдан иборат “Pro-Tur” турнирининг совринли ўринлари учун кураш олиб боради.

Эслатиб ўтамиз, яккалик, жуфтлик ва аралаш жамоавий тартибда ўтаётган мусобақада ғолибликка эришган жамоа 200 миллион, 2-ўрин соҳиби 100 ва 3-ўринни банд этган жамоа 50 миллион сўм миқдоридаги маблағ билан тақдирланади.

Т.Рўзиев, ЎзА