Пойтахтимизда стол тенниси бўйича катталар ўртасида ўтказилаётган Ўзбекистон кубоги мусобақаларининг финал босқичига йўл олган жамоалар номи аниқланди.

Муросасиз кечган ярим финал ўйинларида аёллар ўртасида Фарғона вилояти жамоасини мағлуб этган Тошкент-1 жамоаси финалга йўл олган бўлса, иккинчи жуфтликда Қорақалпоғистон Республикаси теннисчиларидан устунликка эришган Тошкент вилояти қизлари олтин медалга даъвогарлик қилиш ҳуқуқига эга чиқди.

Эркаклар жамоалари ўртасидаги ярим финал баҳсида Тошкент вилояти жамоаси Тошкент-1 теннисчиларини мағлуб этиб, финалга йўл олган бўлса, иккинчи ярим финалчилар тўқнашувида Қорақалпоғистон Республикаси жамоасини доғда қолдирган Фарғона вилояти вакиллари мамлакат кубогига даъвогарликни қўлга киритди.

Бугун, 25 декабрь куни аёллар жамоалари ўртасидаги финал ўйинида Тошкент-1 ва Тошкент вилояти жамоалари рўбарў келса, эркаклар жамоалари ўртасидаги финалда Тошкент ва Фарғона вилоятлари жамоалари Ўзбекистон кубоги кимга тегишли эканига ойдинлик киритади.

Шу ўринда айтиш лозим, ярим финал учрашувлари мамлакатимизда стол теннисининг ёрқин вакиллари етишиб келаётганини кўрсатди.

Жумладан, Фарғона вилоятининг ёш спортчиси, миллий рейтингда 11-ўриндан жой олган Шоирахон Қодированинг ҳаракати мутахассислар ва мухлислар эътиборини тортди. У Тошкент шаҳри жамоаси аъзоси, миллий рейтингда 2-ўринда бораётган, жамоанинг иккинчи рақамли спортчисини мағлуб этди.

У Тошкент жамоасининг биринчи рақамли ракеткачиси Меҳринисо Норқулова билан тенг курашда тажриба етишмаслиги сабабли кичик ҳисобда имкониятни бой берди. Ушбу баҳс мухлислар томонидан ғалабага тенг ўйин сифатида эътироф этилди.

Қайд этиш жоиз, Ўзбекистон кубоги баҳсларида бундай янги ва истиқболли кашфиётлар сони тобора ортиб бораётгани эътиборли.

Т.Рўзиев,

ЎзА