Халқаро стол тенниси федерацияси (ITTF) Жанубий Африканинг Дурбан шаҳрида ўтадиган 2023 йилги жаҳон чемпионати финал босқичида иштирок этадиган спортчилар рўйхатини эълон қилди.

Эътиборлиси, дунёнинг энг кучли кичик ракетка усталари қатнашадиган йилнинг энг муҳим мусобақаси иштирокчилари орасида Ўзбекистон терма жамоасининг икки нафар аъзоси ҳам қайд этилди.  

Айтиш лозимки, чемпионат низомига мувофиқ, жорий йилнинг 20-28-май кунлари ўтадиган дунё биринчилигида стол теннисчилар тўғридан-тўғри иштирок эта олишмайди. Чемпионлик учун курашадиган кичик ракетка усталари рейтингдаги жойлашуви асосида ҳар икки йилда бир марта ташкил этиладиган Жаҳон чемпионатига таклиф этилади.  

Шу маънода, маҳоратли терма жамоамиз аъзолари Марҳабо Магдиева ва Аружан Камолова аёллар ўртасидаги жуфтлик баҳслари рўйхатидан жой олиши юртимизда ушбу спорт тури ривожланаётганидан, ёш стол теннисчиларимиз жаҳон спорт майдонларида эътирофга сазовор натижаларга эришаётганидан далолат.  

ITTF сайтида келтирилган хабарга кўра, 57-бор ўтказилаётган навбатдаги Жаҳон чемпионатининг яккалик баҳсларида 128 нафар (эркаклар ва аёллар) ва жуфтлик мусобақаларида 64 нафар (эркаклар, аёллар ва аралаш) жуфтликлар иштирок этади.  

Чемпионатда ғолибликка эришганлар жаҳон рейтингининг 2000 очкосига, иштирокчилар кўрсатган натижасига қараб маълум бир очколарга эга бўлади.  

Мусобақалар эркаклар ва аёллар ўртасида яккалик, жуфтлик ҳамда аралаш жуфтликлар кўринишида бўлиб ўтади. Жаҳон чемпионати иштирокчилари умумий ҳисобда 5 та медаллар жамланмаси учун кураш олиб боради.  

Т.Рўзиев,  

ЎзА