Халқаро стол тенниси федерацияси жорий йил Англия пойтахти Лондон шаҳрида жамоалар ўртасида ўтказиладиган жаҳон чемпионатида иштирок этадиган терма жамоалар учун ташланган қуръа натижаларини эълон қилди.

Айтиш лозим, бундан юз йил муқаддам, 1926 йили Англияда стол тенниси бўйича биринчи жаҳон чемпионати ўтказилганди. Орадан бир аср ўтиб, дунё биринчилиги яна ушбу масканга қайтмоқда.

Жорий йилнинг 28 апрель-10 май кунлари ташкил этиладиган тарихий жаҳон чемпионатида 64 та эркаклар ва 64 та аёллар миллий терма жамоалари иштирок этиши белгиланган.

Ўзбекистонлик стол тенниси ишқибозлари учун эътиборли жиҳат, 13 кун давомида Лондонда катта ҳаяжон билан ўтадиган жаҳон биринчилигида мамлакатимизнинг эркаклар ва аёллар жамоалари қатнашиши белгиланган.

Мамлакатимизнинг эркаклар жамоаси саралашнинг илк босқичида 4-гуруҳда Бразилия, Венгрия, Пуэрто-Рико жамоалари билан жой олган бўлса, ўзбекистонлик стол теннисчи қизлар жамоаси Австралия, Нигерия, Уэльс вакиллари билан кейинги босқичга чиқиш учун кураш олиб боради.

Жаҳон чемпионати мусобақалари уч босқичда ўтказилади. Илк босқичда гуруҳ ўйинлари, ундан кейин энг юқори рейтингга эга жамоалар учун саралаш ўйинлари, шунингдек, 1А босқич ва 2-босқичда дунёнинг энг яхши жамоалари жаҳон чемпионлиги учун курашадиган плей-офф босқичлари бўлиб ўтади.

Ушбу нуфузли чемпионатда муносиб натижаларга эришишга шайланган ўзбекистонлик стол теннисчилар айни кунларда Хитой тайпейлик тажрибали мураббий, ўз вақтида қитъа чемпионлигига эришган, Олимпия ўйинлари иштирокчиси бўлган Чанг Ен Шу етакчилигидаги машғулотларда иштирок этмоқда.

Т.Рўзиев,  

ЎзА