Ўзбекистон Республикаси Президенти Шавкат Мирзиёев бугун Вашингтон шаҳрига амалий ташрифи доирасида АҚШ Сенатидаги Марказий Осиё бўйича кокус ҳамраиси, сенатор Стив Дэйнс билан учрашув ўтказди. Суҳбат давомида икки мамлакат ўртасидаги стратегик шерикликни мустаҳкамлаш, иқтисодий ҳамкорликни кенгайтириш ва парламентлараро муносабатларни ривожлантириш масалалари муҳокама қилинди. Шу муносабат билан сенатор Стив Дэйнс билан қуйидаги қисқа интервью ташкил этилди.

– Учрашувдаги асосий муҳокама мавзулари ҳақида гапириб берсангиз. Суҳбат нималар ҳақида кечди?

– Ўзбекистон Президенти Шавкат Мирзиёев жаноби олийларини яна Вашингтонда кўриш мен учун катта шараф. Мамлакат етакчисининг меҳмондўстлигини 2024 йил март ойида Тошкентда шахсан ҳис этган эдим. Давлат раҳбари эртага Президент Трамп билан учрашади ва кўплаб муҳим масалаларни муҳокама қилади. Менимча, бугунги кунда АҚШ ва Ўзбекистон ўртасидаги муносабатлар тарихан энг юқори даражага кўтарилган. Биз Президентингизнинг етакчилиги, меҳр-мурававати, илиқ муносабати ва Президент Трамп билан самимий дўстлигидан миннатдормиз.

– Сиз Ўзбекистондаги ўзгаришларга гувоҳ бўлгансиз. Бугунги кунда икки давлат парламентлари ўртасидаги алоқалар ҳам фаол ривожланмоқда. Айни жараёнда парламентлар ролини қандай баҳолайсиз?

–АҚШ Конгресси ҳозир Жексон-Вэник чекловини бекор қилиш устида ишлаяпти. Бу бизга Ўзбекистон ва бутун Марказий Осиё билан муносабатни янада мустаҳкамлаш имконини беради. Қолаверса, табиий ресурслар, энергия, муҳим минераллар ва технологиялар соҳаларида ҳам улкан умумий имкониятларимиз мавжуд. Мавжуд муносабатлар АҚШ учун жуда муҳим. Биз айни ҳамкорликни устувор йўналиш сифатида кўрамиз. Мен яна Ўзбекистонга бориш, Президентингиз билан Тошкентда яна учрашишни интизорлик билан кутяпман.

– Сизнингча, Вашингтон Марказий Осиё мамлакатларидан нима кутяпти?

– Марказий Осиёнинг жойлашуви жуда муҳим: шимолда Россия, шарқда Хитой, жанубда Афғонистон ва Эрон. Бу баъзан мураккаб қўшничилик муҳитини ҳам юзага келтириши мумкин. Бинобарин, АҚШ ҳар доим яқин дўстлик ва шериклик тарафдори бўлиб келган. Биз Ўзбекистонни шундай ишончли ҳамкор сифатида кўрамиз. Дарвоқе, Президент Трамп воситачилигида тузилган Озарбайжон ва Арманистон ўртасидаги тинчлик келишуви “ўрта йўлак” (Middle Corridor) лойиҳасини амалга ошириш имконини беради. Бу йўл АҚШ, Европа ва Марказий Осиё ўртасидаги савдо ва ҳамкорликни ҳам янада ривожлантиради.

<iframe width="650" height="420" src="https://www.youtube.com/embed/-b0KyU408Nw" title="Stiv Deyns: Biz O‘zbekistonni ishonchli hamkor sifatida ko‘ramiz" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Беҳруз Худойбердиев тайёрлади.

Улуғбек Тўхтаев (видео),

ЎзА